ՀՀ իշխանությունները մտադիր են ամրապնդել ԱՊՀ երկրների հետ համագործակցությունը կրթության և գիտության ոլորտում

Կրթության, գիտության, մշակույթի և սպորտի նախարարի տեղակալ Արթուր Մարտիրոսյանը նոյեմբերի 25-ին հայտարարել է, որ առաջարկվող փոփոխությունները միտված են ԱՊՀ երկրների ոլորտային համագործակցության ամրապնդմանն ու արդյունավետ կառավարման ապահովմանը։ Այս մասին նա ասել է ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նիստում՝ «Անկախ պետությունների համագործակցության մասնակից պետությունների ֆիզիկական կուլտուրայի և սպորտի բնագավառում համագործակցության մասին 2007 թվականի մայիսի 25-ի համաձայնագրում փոփոխություններ և լրացումներ կատարելու մասին» 2012 թվականի մայիսի 30-ի արձանագրության վավերացման նախագծի քննարկման ժամանակ։

Ըստ փոխնախարարի, դրանք նպաստում են նաև սպորտի և ֆիզիկական կուլտուրայի բնագավառում համատեղ նախաձեռնությունների իրականացմանը։ Հիմնական փոփոխություններն ու լրացումները, մասնավորապես, վերաբերում են համաձայնագրի իրավական ձևակերպումների, Խորհրդի գործառույթների հստակեցմանը և դրա կառուցվածքի կատարելագործմանը, Քարտուղարության դերի ու լիազորությունների հստակեցմանը, ինչպես նաև Խորհրդի նիստերի կազմակերպման և ֆինանսավորման կարգի սահմանմանը։

Արձանագրությունը ստորագրել են Հայաստանի Հանրապետությունը, Բելառուսի Հանրապետությունը, Ղազախստանի Հանրապետությունը, Ղրղզստանի Հանրապետությունը, Ռուսաստանի Դաշնությունը և Տաջիկստանի Հանրապետությունը։

Որոշ քննարկումներից հետո նախագիծը ստացել է ԱԺ մշտական հանձնաժողովի դրական եզրակացությունը։