Ամերիկյան Anthropic-ը թողարկել է ԱԲ մոդելի նոր՝ Claude Opus 4.1 տարբերակը

Bloomberg-ի տվյալներով՝ արհեստական բանականություն մշակողի տարեկան եկամուտը գնահատվում է մոտ 5 միլիարդ դոլար։

Ամերիկյան Anthropic ընկերությունը թողարկել է իր արհեստական բանականության (AI) մոդելի նոր՝ Claude Opus 4.1 տարբերակը, որը բարելավել է ծրագրավորման և տվյալների վերլուծության ոլորտում հնարավորությունները: Այս մասին հայտնել է մշակողի մամուլի ծառայությունը:

«Claude Opus 4.1-ը Claude Opus 4-ի բարելավված մոդիֆիկացիա է, որն ուղղված է ինքնավար առաջադրանքների (երբ արհեստական բանականությունը գործում է ինքնուրույն-Խմբ.) ճշգրտության բարձրացմանը, ծրագրավորմանը և տրամաբանական վերլուծությանը», - ասվում է հաղորդագրության մեջ։

Փաստաթղթում նշվում է, որ նոր տարբերակն ավելի արդյունավետ է ծրագրային կոդերի սխալները շտկելու հարցում՝ ծրագրավորման ճշգրտությունը հասցնելով 74.5%-ի, ինչպես նաև ցուցադրում է բարձր արդյունավետություն տեղեկատվության խորը վերլուծության և հետազոտությունների ոլորտում։

«Այժմ մոդելն ավելի լավ է հաղթահարում ինքնավար գործողություններ պահանջող առաջադրանքները։ Մենք պարզապես այն ավելի հարմար և օգտակար ենք դարձնում մարդկանց համար», - բացատրել է ընկերության ներկայացուցիչը։

Bloomberg-ը հաղորդում է, որ Anthropic-ը հիմնադրվել է 2021 թվականին OpenAI-ի նախկին աշխատակիցների խմբի կողմից։ Դրա հիմնական մրցակցային առավելությունը ծրագրավորման համար նեյրոնային ցանցերի մոդելների մշակման վրա կենտրոնացումն է, որը Anthropic-ի եկամտի զգալի մասն է ապահովում։ 

Bloomberg-ի տվյալներով՝ արհեստական բանականություն մշակողի տարեկան եկամուտը գնահատվում է մոտ 5 միլիարդ դոլար։ Բացի այդ, ըստ տեղեկությունների՝ ընկերությունը գտնվում է առնվազն 5 միլիարդ դոլարի ներդրումային գործարքի կնքման վերջին փուլում, որի արդյունքում Anthropic-ի շուկայական արժեքը կհասնի 170 միլիարդ դոլարի։