Թեհրանից աղտոտված օդի՝ Հայաստան ներթափանցման վտանգ չկա

ՀՀ «Հիդրոօդերևութաբանության և մոնիթորինգի կենտրոն»-ը հայտարարել է, որ Ամբերդի դիտակայանում իրականացված մթնոլորտային տեղումների որակական մոնիթորինգի արդյունքներով թթվայնության կամ քիմիական կազմի փոփոխություններ չեն արձանագրվել։

Անդրադառնալով լրատվամիջոցներում տարածված «թթվային թունավոր անձրևների» վերաբերյալ հրապարակումներին՝ Կենտրոնից հայտնել են, որ մարտի 7-8-ը տեղացած տեղումների ուսումնասիրության համաձայն՝ թթվայնության, ինչպես նաև անիոնային և կատիոնային կազմի փոփոխություններ չեն դիտվել։

Օդային հոսանքների կանխատեսում

Հաղորդագրության համաձայն՝

• մարտի 9-11-ը Հայաստանը գտնվելու է հյուսիս-արևելյան օդային հոսանքների ազդեցության գոտում,

• մարտի 12-20-ը հանրապետությունում հիմնականում կգերակշռեն հարավ-արևմտյան հոսանքները, որոնք ձևավորվում են Միջերկրական ծովի ավազանում։

Մթնոլորտային գործընթացների վերլուծությունը ցույց է տալիս, որ առաջիկա օրերին Իրանի տարածքից դեպի ՀՀ օդային հոսանքների ներթափանցում չի կանխատեսվում։

Կենտրոնը նշում է, որ հարավային ցիկլոնների ներթափանցումը ՀՀ տարածք հիմնականում դիտվում է Իրաքի շրջաններից, իսկ նման երևույթները տարածաշրջանում խիստ հազվադեպ են։ Միաժամանակ առաջիկա 10 օրերին Իրանի տարածքում օդային հոսանքները շարժվելու են արևմուտքից արևելք՝ դեպի Թուրքմենստան։

Պաշտոնական կոչ

Կառույցը ընդգծել է, որ իրականացվում է մթնոլորտային պայմանների մշտադիտարկում, և առաջին իսկ փոփոխությունների դեպքում հանրությունը կտեղեկացվի։

«Բնակչությանը հորդորում ենք հետևել միայն ՊՈԱԿ-ի կողմից տրված պաշտոնական տեղեկատվությանը»,- նշվում է հաղորդագրությունում։

Հիշեցնենք, որ մարտի 8-ին Իսրայելի պաշտպանության բանակը հայտարարել էր Իրանում նավթապահեստավորման 30 օբյեկտի հարվածների մասին, ինչից հետո որոշ լրատվամիջոցներում տարածվել էին տեսանյութեր՝ Թեհրանում հնարավոր թթվային անձրևների վերաբերյալ։