Ուսուցիչների 1 դրույքը սահմանվել է 18 դասաժամ․ ԿԳՄՍ նախարար

Ուսուցիչների զբաղվածության մակարդակը նույնպես զգալիորեն աճել է։

ՀՀ կրթության, գիտության, մշակույթի և սպորտի նախարար Ժաննա Անդրեասյանը Ազգային ժողովում 2026 թվականի պետական բյուջեի նախնական քննարկման ժամանակ ներկայացրեց հանրակրթության ոլորտում վերջին տարիների հիմնական առաջընթացները՝ շեշտելով ուսուցիչների ծանրաբեռնվածության և վարձատրության բարելավումը։ Նախարարը նշեց, որ դպրոցների ֆինանսավորումը 2019 թվականի 85.26 միլիարդ դրամից աճել է մինչև 2026 թվականի բյուջեում նախատեսված 131.6 միլիարդ դրամի, ինչը 64.8 տոկոսով ավելի է նախորդ ժամանակաշրջանի համեմատ։

«Կարևոր բարեփոխումներից է նաև ուսուցչական ծանրաբեռնվածության վերանայումը․ եթե նախկինում մեկ դրույքը 22 դասաժամ էր, ապա այժմ այն սահմանվել է 18 դասաժամ՝ տարրական և 20 դասաժամ՝ հիմնական ու ավագ դպրոցների համար։ Սա ուղղակիորեն նպաստում է կրթության որակի բարձրացմանը և ուսուցչի աշխատանքի արժևորմանը»,-նշեց Անդրեասյանը։

Նրա խոսքով՝ ուսուցիչների զբաղվածության մակարդակը նույնպես զգալիորեն աճել է։

«Եթե 2019-ին մեկ դրույք և ավելի ծանրաբեռնված էր 6971 ուսուցիչ՝ ընդհանուր 31 հազարից, ապա այսօր այդ թիվը հասել է մոտ 14 հազարի։ Սա վկայում է համակարգի արդյունավետության բարձրացման և մարդկային ռեսուրսների ճիշտ օգտագործման մասին»,-ընդգծեց նախարարը։

Բացի դրանից, նախարարի խոսքով՝ բարձրացել է ուսուցչական կազմի կրթական մակարդակը։

«2019 թվականին համակարգում ունեինք ավելի քան 2200 ուսուցիչ, որոնք չունեին բարձրագույն կրթություն։ Այսօր նրանց թիվը նվազել է մինչև 594։ Նրանք կամավոր ատեստավորման միջոցով հավաստել են իրենց առարկայական գիտելիքները և շարունակում են աշխատել»,-տեղեկացրեց Ժաննա Անդրեասյանը։