Թեյլոր Սվիֆթի կարողությունը հասել է 2 մլրդ դոլարի

Forbes-ի գնահատմամբ՝ երգչուհու հարստության հիմնական աղբյուրը նրա երաժշտական կատալոգն է:

Ամերիկացի երգչուհի Թեյլոր Սվիֆթի կարողությունը վերջին ամիսներին աճել է շուրջ 400 միլիոն դոլարով։ Forbes-ի վերջին տվյալների համաձայն՝ նրա ընդհանուր կարողությունը հասել է 2 միլիարդ դոլարի։

Սվիֆթը զբաղեցնում է յոթերորդ տեղը Forbes-ի «Աշխարհի հայտնի միլիարդատերերի» ցուցակում։ Ցուցակում ներառված են այն հայտնիները, ովքեր միլիարդավոր կարողություն են կուտակել սեփական կարիերայի շնորհիվ, այլ ոչ թե ժառանգությամբ։

Եկամտի աղբյուրները

Forbes-ի գնահատմամբ՝ երգչուհու հարստության հիմնական աղբյուրը նրա երաժշտական կատալոգն է, որը գնահատվում է մոտ 900 միլիոն դոլար։ Բացի այդ, նրա անշարժ գույքը գնահատվում է շուրջ 100 միլիոն դոլար։

Կարևոր դեր է ունեցել նաև The Eras շրջագայությունը, որն ավարտվել է 2024 թվականի վերջին և դարձել երաժշտության պատմության մեջ ամենաբարձր եկամուտ ունեցող համերգային շրջագայությունը։