Հարկ վճարողի հետ ազնիվ ու թափանցիկ հարաբերությունները մեր հիմնական ուղենիշն են. ՊԵԿ նախագահ

ՊԵԿ նախագահ Էդուարդ Հակոբյանը հարկային ծառայողներին շնորհավորել է Հայաստանի Հանրապետության հարկային ծառայության ստեղծման օրվա առթիվ։

«Այս օրը ոչ միայն մասնագիտական տոն է, այլ նաև առիթ՝ արժևորելու ձեր դերը մեր երկրի կայացման և կայուն զարգացման գործում։ Անկախության ամբողջ ընթացքում հարկային ծառայողները հիմնարար դեր են կատարել պետականության ամրապնդման գործում:

Ձեր հետևողական աշխատանքի շնորհիվ է, որ կարողանում ենք հասարակություն-հարկ վճարող-հարկային ծառայող-պետություն կապի ամրապնդման միջոցով ապահովել մեր պետության և նրա ինստիտուտների անխափան գործունեությունը, զարգացնել տնտեսությունը և բարձրացնել բոլորիս կյանքի որակը։

Այսօր, երբ մեր երկիրն առերեսվում է բազմաբնույթ մարտահրավերների ու հնարավորությունների, ձեր պատասխանատվությունը կրկնակի մեծ է․ դուք ապահովում եք պետության տնտեսական անվտանգությունը և հասարակության արդար սպասելիքների իրականացումը։ Վերջին տարիների ձեռքբերումները՝ հարկային եկամուտների աճը, աշխատատեղերի ավելացումը, ստվերային տնտեսության կրճատման ուղղությամբ գործադրված քայլերը, վկայում են ձեր համառ ու նպատակային աշխատանքի մասին։

Միաժամանակ, պետք է միասնական ջանքերով արագացնենք դրական վերափոխումները։ Պետք է շարունակենք կատարելագործել վարչարարությունը, ընդլայնել թվային տեխնոլոգիաների կիրառությունը, զարգացնել վերլուծական կարողությունները և բարձրացնել հարկ վճարողների սպասարկման որակը։

Հարկ վճարողի հետ ազնիվ ու թափանցիկ հարաբերությունները մեր հիմնական ուղենիշն են։ Դրա հիմքում մարդակենտրոն մոտեցումն է․ հարկ վճարողի խնդիրները պետք է ընկալել որպես սեփական և հոգատարությամբ օժանդակել դրանց լուծմանը։

Մենք գիտակցում ենք նաև մեր պատասխանատվությունը՝ տնտեսության խթանման և հարկերի հավաքագրման միջև հավասարակշռություն գտնելու գործում։ Սա այն ուղին է, որը թույլ կտա միաժամանակ զարգացնել բիզնես միջավայրը, ապահովել ներդրումների համար բարենպաստ պայմաններ և բարձրացնել հարկային եկամուտների հավաքագրման մակարդակը։ Այս ուղղությամբ Պետական եկամուտների կոմիտեն հետևողական է լինելու, որպեսզի հանրության համար եկամուտների ծառայությունը լինի արհեստավարժ, գիտելիքահեն, հարմարավետ և նվազագույն շփումներով։

Արդարությունը մեր ամենօրյա գործերի, մեր գործողությունների և բարեփոխումների հիմքում է: Չափազանց կարևոր է հարկ վճարողների հետ փոխհարաբերություններում առաջնորդվել նաև արդարության ուղենիշով, որը թույլ կտա վերաիմաստավորել Պետական եկամուտների կոմիտեի դերը և բարձրացնել հասարակական աջակցության մակարդակը:

Հարկային ծառայության առաքելությունը չի սահմանափակվում միայն թվերով ու ցուցանիշներով․ այն նաև վստահության և հոգատարության մշակույթ է։ Ձեր աշխատանքի շնորհիվ պետք է խորանա այն վստահությունը, որ յուրաքանչյուր վճարված դրամ ուղղվում է պետության և ժողովրդի բարօրությանը և հիմքեր ստեղծում յուրաքանչյուր քաղաքացու երջանիկ դարձնելու ճանապարհին։ Դա է մեր գլխավոր նպատակը և պարտքը ներկա ու ապագա սերունդների առաջ։

Կրկին շնորհավորում եմ ձեզ տոնի առթիվ։

Մաղթում եմ մասնագիտական և անձնական նոր հաջողություններ, քաջառողջություն և անսպառ եռանդ՝ ի նպաստ Հայաստանի Հանրապետության հզորացման և մեր ժողովրդի բարեկեցիկ ապագայի»,- նշված է ուղերձում։