Արտահանման պետական աջակցության ծրագիրն ընդլայնվել է. ովքե՞ր կստանան փոխհատուցում

ՀՀ Կառավարությունը հաստատել է արտահանման աջակցության պետական միջոցառումների երկարաձգման և ընդլայնման մասին որոշումների փաթեթը։ Ըստ այդմ՝ ջերմատնային արտադրության թարմ պտուղբանջարեղենի, ծաղիկների, ինչպես նաև թարմ պտղի, ալկոհոլային խմիչքների և հանքային ջրերի արտահանման փոխհատուցման գործիքակազմը կգործի նաև 2026 թվականի հուլիս ամսվա ընթացքում։

Որոշման հիմնավորումը և շուկաների դիվերսիֆիկացիան Ըստ պաշտոնական հիմնավորման՝ պետական աջակցության երկարաձգումը պայմանավորված է արտաքին շուկաներում տեղական արտադրողների մրցունակության պահպանման և արտահանման աշխարհագրության ընդլայնման անհրաժեշտությամբ։ Տնտեսավարողների կողմից նոր շուկաների ուղղությամբ վարվող ակտիվ բանակցություններում գնառաջարկները ձևավորվում են՝ հաշվի առնելով պետական փոխհատուցման գործոնը։

1. Ջերմատնային արտադրություն և ծաղկաբուծություն Հունիս ամսվա ընթացքում ՍԱՏՄ օպերատիվ տվյալներով արտահանվել է 784 տոննա պղպեղ, 208 տոննա լոլիկ, 109 տոննա ելակ, ինչպես նաև 35 տոննա և 3.5 մլն հատ ծաղիկ։ Հուլիսի կանխատեսվող ծավալներն են՝ 150 տոննա ելակ, 3900 տոննա բանջարեղեն և 5.2 մլն հատ ծաղիկ։

Նորություն. Ցանկը լրացվել է չերի տեսակի լոլիկով։ Բարձրացվել է դեպի ԵՄ, Մեծ Բրիտանիա և Շվեյցարիա արտահանվող ծաղիկների փոխհատուցումը։

Հուլիսի փոխհատուցման դրույքաչափերը (1 կգ/1 հատի համար).

• Ելակ՝ 770 ՀՀ դրամ/կգ

• Լոլիկ՝ 275 ՀՀ դրամ/կգ

• Չերի լոլիկ՝ 400 ՀՀ դրամ/կգ

• Պղպեղ՝ 400 ՀՀ դրամ/կգ

• Ծաղիկ (ընդհանուր)՝ 37 ՀՀ դրամ/հատ

• Ծաղիկ (դեպի ԵՄ, Մեծ Բրիտանիա, Շվեյցարիա)՝ 50 ՀՀ դրամ/հատ

2. Թարմ պտուղ, սննդամթերք և խմիչքներ Հունիսի արտահանման ցուցանիշներն են՝ 2948 տոննա ծիրան, 1402 տոննա կեռաս և 1 տոննա սալոր։ Հուլիսի կանխատեսվող ծավալներն են՝ 13 հազար տոննա պտուղ, 1.4 մլն լիտր հանքային ջուր, 200 հազար լիտր խաղողի գինի, 250 հազար լիտր պտղահատապտղային գինի, 500 հազար բացարձակ լիտր կոնյակ, 70 տոննա չրեր/չորացրած բանջարեղեն, 140 տոննա ձուկ։

Նորություն. Ցանկը լրացվել է չորացրած մրգերով և բանջարեղենով, ինչպես նաև իշխան և թառափ տեսակի ձկներով։

Հուլիսի փոխհատուցման դրույքաչափերը (1 կգ/1 լիտրի համար).

• Ծիրան՝ 200 ՀՀ դրամ/կգ

• Սալոր, դեղձ, նեկտարին՝ 250 ՀՀ դրամ/կգ

• Կեռաս՝ 400 ՀՀ դրամ/կգ

• Շշալցված խաղողի գինի՝ 350 ՀՀ դրամ/լիտր

• Շշալցված պտղահատապտղային գինի՝ 200 ՀՀ դրամ/լիտր

• Շշալցված բրենդի՝ 830 ՀՀ դրամ/բացարձակ լիտր

• Շշալցված հանքային ջուր՝ 150 ՀՀ դրամ/լիտր

• Չորացրած միրգ և բանջարեղեն՝ 250 ՀՀ դրամ/կգ

• Իշխան տեսակի ձուկ՝ 820 ՀՀ դրամ/կգ

• Թառափ տեսակի ձուկ՝ 1350 ՀՀ դրամ/կգ