Խնամքի հաստատությունների աշխատակիցների աշխատավարձը կբարձրանա 30%-ով

Աշխատակիցները բարձրացված աշխատավարձը կստանան մայիս ամսին։

Աշխատանքի և սոցիալական հարցերի նախարար Արսեն Թորոսյանը հայտարարել է, որ նախարարության ենթակայությամբ գործող հաստատությունների աշխատակիցների աշխատավարձերը կբարձրանան 30%-ով։

Նրա խոսքով՝ բարձրացումը ուժի մեջ կմտնի ապրիլի 1-ից և կվերաբերի խնամքի կենտրոնների, երեխաների, տարեցների և հոգեկան առողջության խնդիրներ ունեցող քաղաքացիների հետ աշխատող հաստատությունների, ինչպես նաև ցերեկային կենտրոնների բոլոր աշխատակիցներին։

Նախարարը նշել է, որ այս փոփոխությանը հաջողվել է հասնել բյուջետային կարգապահության և արդյունավետ կառավարման շնորհիվ։

Աշխատակիցները բարձրացված աշխատավարձը կստանան մայիս ամսին։

Թորոսյանը նաև ընդգծել է, որ ակնկալում է աշխատանքի որակի բարելավում և ավելի մեծ ներգրավվածություն ծառայությունների մատուցման գործընթացում։

Նա հավելել է, որ աշխատակիցների աշխատանքային պայմանների բարելավումը նախարարության առաջնահերթություններից է։

Հիշեցնենք, որ ավելի վաղ հայտարարվել էր նաև կենսաթոշակների 10,000 դրամով բարձրացման մասին, ինչպես նաև Երևանի մանկապարտեզների աշխատակիցների աշխատավարձերի աճի վերաբերյալ։