2018-ի համեմատ սպորտի ֆինանսավորումը քառապատկվել է՝ հասնելով ավելի քան 15 մլրդ դրամի

Սպորտային ենթակառուցվածքների զարգացման նպատակով 2025 թվականին ընթացքի մեջ է եղել շուրջ 100 սպորտային ենթակառուցվածքների շինարարություն։

2018 թվականի համեմատ սպորտի ոլորտի ֆինանսավորումը Հայաստանում ավելի քան քառապատկվել է՝ հասնելով ավելի քան 15 միլիարդ դրամի։ Այս մասին Ֆեյսբուքի իր էջում հրապարակված տեսանյութում հայտարարել է ԿԳՄՍ նախարար Ժաննա Անդրեասյանը։

Նրա խոսքով՝ մասսայական սպորտի ուղղությամբ ֆինանսավորումն աճել է ավելի քան 25 անգամ՝ կազմելով 5,5 միլիարդ դրամ։

«Սպորտային ենթակառուցվածքների զարգացման նպատակով 2025 թվականին ընթացքի մեջ է եղել շուրջ 100 սպորտային ենթակառուցվածքների շինարարություն, այդ թվում՝ մեր անվանի մարզիկների անունները կրող սպորտային համալիրները»,- նշել է նախարարը։

Տեսանյութին կից նշվում է, որ ավարտվել է Արմավիրի մարզի Ջրառատ համայնքում Սիմոն Մարտիրոսյանի անվան ծանրամարտի մարզադահլիճի շինարարությունը։

Շինարարության փուլում են նաև՝

  • Շիրակի մարզի Գյումրի քաղաքում Արթուր Ալեքսանյանի անվան հունահռոմեական ըմբշամարտի մանկապատանեկան դպրոցը,

  • Հրանտ Շահինյանի անվան սպորտային մարմնամարզության և ակրոբատիկայի օլիմպիական մանկապատանեկան մարզադպրոցը,

  • Արթուր Աբրահամի անվան մարզադպրոցը։

Նախատեսվում է նաև կառուցել Վիկ Դարչինյանի, Ռոման և Մալխաս Ամոյանների, Յուրի Սարգսյանի, Նազիկ Ավդալյանի անվան մարզադպրոցներ, ինչպես նաև Ստեփան Սարգսյանի անվան ըմբշամարտի մարզադպրոց։