Հարավային Կովկասում տնտեսական աճի հեռանկարները․Համաշխարհային բանկի նոր կանխատեսումը

Համաշխարհային բանկը նաև զգուշացնում է տարածաշրջանային ռիսկերի մասին։

Համաշխարհային բանկը հրապարակել է Հարավային Կովկասի երկրների միջնաժամկետ մակրոտնտեսական կանխատեսումները, որոնց համաձայն՝ Հայաստանի տնտեսությունը 2026 թվականին կաճի 4.9%-ով, իսկ 2027 թվականին՝ 4.7%-ով։

Կանխատեսման համաձայն՝ տարածաշրջանում ամենաբարձր տնտեսական աճը սպասվում է Վրաստանում։ Ըստ Համաշխարհային բանկի գնահատականների՝ Վրաստանի տնտեսությունը 2026 թվականին կաճի 5.5%-ով, իսկ 2027 թվականին՝ 5%-ով։

Ադրբեջանում տնտեսական աճի տեմպերը կմնան զգալիորեն ավելի ցածր։ Կանխատեսվում է, որ Ադրբեջանի տնտեսությունը 2026 թվականին կաճի 1.8%-ով, իսկ 2027 թվականին՝ 1.7%-ով։

Համաշխարհային բանկը նաև զգուշացնում է տարածաշրջանային ռիսկերի մասին։ Մասնավորապես նշվում է, որ հայ-ադրբեջանական խաղաղության գործընթացում հնարավոր անհաջողությունները կարող են բացասաբար ազդել տարածաշրջանի երկրների տնտեսական հեռանկարների վրա և հանգեցնել ՀՆԱ-ի աճի տեմպերի նվազման։

Միևնույն ժամանակ, կանխատեսման մեջ ընդգծվում է, որ խաղաղության գործընթացում առաջընթացի պարագայում կարող են ձևավորվել նոր հնարավորություններ՝ ամրապնդելով Հարավային Կովկասի երկրների տնտեսական ինտեգրումը, կապուղիների զարգացումը և ներդրումային միջավայրի կայունացումը։