Երուսաղեմում տեղի ունեցած հրաձգության հետևանքով վեց մարդ է զոհվել

Երուսաղեմի հյուսիսում տեղի ունեցած հրաձգության հետևանքով զոհերի թիվը հասել է վեցի։

Այս մասին Հունգարիայի արտաքին գործերի նախարար Պետեր Սիյարտոյի հետ համատեղ մամուլի ասուլիսի ժամանակ հայտարարել է Իսրայելի արտաքին գործերի նախարար Գիդեոն Սաարը։

«Այս առավոտ Երուսաղեմում սարսափելի ահաբեկչություն է տեղի ունեցել։ Այս պահին մահացել է վեց իսրայելցի, կան բազմաթիվ տուժածներ, այդ թվում՝ հղի կին», - ասել է Սաարը։

Նա հավելել է, որ, իրավապահ մարմինների նախնական տվյալներով, հարձակման հետևում կանգնած են երկու պաղեստինցիներ, որոնք կրակ են բացել ուղևորատար ավտոբուսի վրա՝ Երուսաղեմի հյուսիսային ծայրամասում։

Ավելի վաղ Իսրայելի շտապօգնության ազգային ծառայությունը հայտնել էր հինգ զոհի մասին։ Նշվում էր նաև, որ ընդհանուր առմամբ տուժել և հոսպիտալացվել է 12 մարդ։ Նրանցից յոթը ստացել են ծանր հրազենային վնասվածքներ, երկուսի վիճակը միջին ծանրության է, իսկ երեքը՝ ապակու բեկորներից թեթև վնասվածքներ են ստացել։