Տարեսկզբից 1,5 միլիոն անօրինական միգրանտներ են լքել ԱՄՆ-ի տարածքը

Անօրինական միգրանտների զանգվածային հեռացումը վարչակազմի կարևոր ձեռքբերում է դարձել և արդեն շոշափելի արդյունքներ է տվել:

Տարեսկզբից Միացյալ Նահանգների տարածքը լքել է մեկուկես միլիոն անօրինական միգրանտ։ Այս մասին հայտնում է «24KZ»-ը։ Այս թիվը ներառում է նաև նրանց, ովքեր երկիրը լքել են ինքնակամ՝ կամավոր ինքնաարտաքսման ծրագրի շրջանակներում։ Այդ մասին սոցիալական ցանցերում հայտնել է Ներքին անվտանգության նախարար Քրիստի Նոյեմը։

Նրա խոսքով, անօրինական միգրանտների զանգվածային հեռացումը վարչակազմի կարևոր ձեռքբերում է դարձել և արդեն շոշափելի արդյունքներ է տվել. երկրում նվազել է հանցավորությունը, թեթևացել է դպրոցների և հիվանդանոցների բեռը, ամերիկացիների համար ավելի շատ աշխատատեղեր են հայտնվել։

Նշենք, որ Սպիտակ տունը կամավոր ինքնաարտաքսման ծրագիրը գործարկել է մայիսի սկզբին։ Այն միգրանտներին տրամադրում է 1000 դոլարի չափով վճար և ուղեկցություն՝ հայրենիք վերադառնալու ժամանակ, ինչը նրանց հնարավորություն է տալիս խուսափել ներգաղթի և մաքսային ծառայությունների հետ կապված խնդիրներից։