ՇՄ նախարարը և ԵՄ դեսպանը քննարկել են կանաչ անցման, վերականգնվող էներգիայի ծրագրերի շրջանակներում համագործակցության ընդլայնման հնարավորությունները

Շրջակա միջավայրի նախարար Համբարձում Մաթևոսյանն այսօր ընդունել է Հայաստանում Եվրոպական միության պատվիրակության ղեկավար, դեսպան Վասիլիս Մարագոսի գլխավորած պատվիրակությանը։ Այս մասին ֆեյսբուքյան իր էջում գրել է նախարարը:

«Հանդիպման ընթացքում վերահաստատեցինք մեր պատրաստակամությունը՝ խորացնելու համագործակցությունը բնապահպանության ոլորտում, ընդլայնելով այն թե՛ քաղաքական, թե՛ գործնական մակարդակներում։

Շնորհակալություն հայտնեցի Եվրոպական միությանը՝ տարիներ շարունակ Հայաստանի Հանրապետությանը ցուցաբերած հետևողական աջակցության համար։ Այն ծրագրերը, որոնք իրականացվել և շարունակվում են ԵՄ-ի օժանդակությամբ՝ թե՛ կլիմայի փոփոխության, թե՛ մթնոլորտային օդի պաշտպանության, ջրային ռեսուրսների կառավարման և կենսաբազմազանության պահպանության ուղղություններով, էական ներդրում են ունեցել մեր երկրի կայուն զարգացման գործընթացում։

Քննարկեցինք նաև կանաչ անցման, վերականգնվող էներգիայի, կլիմայի դիմակայունության ծրագրերի շրջանակներում համագործակցության ընդլայնման հնարավորությունները։ Շեշտադրեցինք մթնոլորտային օդի մոնիթորինգի և կառավարման, ինչպես նաև Սևանա լճի էկոլոգիական վիճակի բարելավման համատեղ ծրագրերի կարևորությունը։

Հանդիպման առանցքային թեմաներից մեկը 2026 թվականին Հայաստանում անցկացվելիք Կենսաբազմազանության մասին կոնվենցիայի COP17 համաժողովի կազմակերպման և նախապատրաստական աշխատանքներն էին։

Գործընկերներին ներկայացրեցի, որ արդեն իսկ ակտիվ աշխատանքներ են ընթանում համաժողովի բովանդակային օրակարգի մշակման, ենթակառուցվածքների բարելավման, ինչպես նաև միջազգային և տեղական շահակիցների ներգրավման ուղղությամբ։ Մենք մեծ կարևորություն ենք տալիս այս համաժողովին ոչ միայն որպես համաշխարհային բնապահպանական իրադարձություն, այլև որպես հարթակ՝ ներկայացնելու Հայաստանի հանձնառությունը՝ համաշխարհային կենսաբազմազանության պահպանության գործում։

Համոզված եմ՝ մեր երկկողմ համագործակցությունն առաջիկա տարիներին կունենա ավելի կոնկրետ, շոշափելի արդյունքներ՝ ի նպաստ թե՛ շրջակա միջավայրի պահպանության, թե՛ մեր քաղաքացիների կյանքի որակի բարելավման»,- ասված է նախարարի գրառման մեջ։