Սերբիան ժամանակավորապես արգելել է նավթի և վառելիքի արտահանումը

Սերբիայում քաղաքացիները նավթամթերքի համար վճարում են բորսայական արժեքից ցածր։

Սերբիայի կառավարությունն արտահերթ նիստում որոշում է կայացրել ժամանակավորապես արգելել նավթի և բոլոր տեսակի շարժիչային վառելիքների արտահանումը։ Քայլի նպատակն է կանխել ներքին շուկայում հնարավոր դեֆիցիտը և զսպել գների աճը։

Սերբիայի հանքարդյունաբերության և էներգետիկայի նախարար Դուբրավկա Ջեդովիչ-Հանդանովիչը հայտնել է, որ արգելքը վերաբերում է դիզելային վառելիքին, բենզինին և նավթին։

«Արգելքը գործելու է բոլոր տեսակի տրանսպորտով արտահանման համար՝ մինչև մարտի 19-ը, որից հետո նոր որոշումներ կկայացնենք։ Այս քայլի նպատակն է պաշտպանել մեր ներքին շուկան դեֆիցիտից և գների կտրուկ աճից՝ համաշխարհային շուկայում տեղի ունեցող ցնցումների ֆոնին», - նշել է նախարարը։

Նա նաև ընդգծել է, որ Սերբիայում քաղաքացիները նավթամթերքի համար վճարում են բորսայական արժեքից ցածր, և պետությունը շարունակում է քայլեր ձեռնարկել ներքին շուկայի և տնտեսության պաշտպանման ուղղությամբ։