Սեպտեմբերի 24-ի բիզնես լուրերը

Տեղական

ԱՄՀ ծրագրի ընթացքը Հայաստանում
Փոխվարչապետ Մհեր Գրիգորյանը և ԱՄՀ հայաստանյան առաքելության ղեկավար Ալեքսանդր Թիմանը քննարկել են Պահուստային 3-ամյա ծրագրի ընթացքը։ Քննարկվել են նաև նոր ծրագրի ուղղությունները, որոնք վերաբերում են դրամավարկային, հարկային և թվայնացման բարեփոխումներին։

Աշխատատեղերի աճ վերջին 7 տարում
ԱՍՀ նախարար Արսեն Թորոսյանի խոսքով՝ վերջին յոթ տարիներին Հայաստանում ստեղծվել է շուրջ 200 հազար նոր աշխատատեղ։ Միաժամանակ նա կարևորել է խոցելի խմբերի ներառմանն ուղղված պետական քաղաքականության շարունակականությունը։

Խորհրդարանական լսումներ բիզնես միջավայրի վերաբերյալ
Երևանում անցկացվելու են խորհրդարանական լսումներ՝ նվիրված գործարար միջավայրի բարելավմանը։ Դրանց նպատակն է լսել պետական մարմինների և մասնավոր հատվածի առաջարկները։

Օգնություն ԼՂ-ից տեղահանվածներին
ՀՀ կառավարությունը Արցախի տեղահանվածների համար տրամադրել է ավելի քան 117 մլրդ դրամ։ Միայն բնակարանային ապահովման ծրագրի շրջանակում այս տարի հատկացվել է շուրջ 1.3 մլրդ դրամ։

Միջազգային

Իրան-Ռուսաստան նոր միջուկային համաձայնագիր
Իրանը և Ռուսաստանը պատրաստվում են ստորագրել ութ նոր ատոմակայանների կառուցման մասին պայմանագիր։ Դրանցից չորսը նախատեսվում է կառուցել Բուշերում։

ՌԴ և Թուրքիայի վարկային համաձայնագիր
Ռուսաստանի Պետդուման վավերացրել է վարկային համաձայնագրի արձանագրությունները Թուրքիայի հետ։ Դրանք ճանաչում են թուրքական կողմի՝ ժամկետանց պարտավորությունների պատշաճ կատարումը։

Վրաստանի ՀՆԱ-ի աճը
Տարվա երկրորդ եռամսյակում Վրաստանի իրական ՀՆԱ-ն տարեկան կտրվածքով աճել է 7.3%-ով։ Աճին մեծապես նպաստել են տեղեկատվության, կրթության և ժամանցի ոլորտները։

Porsche-ի ֆինանսական կանխատեսումները
Porsche-ն 2025թ. սպասում է 37-38 մլրդ եվրոյի եկամուտ։ Միևնույն ժամանակ ընկերությունը նվազեցրել է շահութաբերության կանխատեսումը՝ մինչև 2%։

Հետաքրքիր

«Սյունիք» օդանավակայանի գործունեությունը
«Սյունիք» օդանավակայանը հայտարարել է, որ չի դադարեցրել աշխատանքը։ Երևան-Կապան-Երևան չվերթը ժամանակավորապես դադարեցվել է միայն ինքնաթիռի պլանային տեխնիկական սպասարկման պատճառով։