Ինչ է կատարվել այսօր Հայաստանում և արտերկրում՝ դիտեք բոլոր կարեւոր, օգտակար եւ հետաքրքիր լուրերը` նոր մանրամասներով Armenian Business News-ի եթերում, տեսանյութերում եւ www.abnews.am կայքում

Թրամփի նոր շփոթը՝ Հայաստան vs Ալբանիա

ԱՄՆ նախագահ Դոնալդ Թրամփը կրկին շփոթել է Հայաստանի և Ալբանիայի անունները։ Վերջին ելույթի ժամանակ նա հայտարարեց, թե Հայաստանը պատերազմել է Կամբոջայի հետ, իսկ ինքը կանգնեցրել է այդ պատերազմը։ Թրամփը թվարկել է նաև մի շարք երկրներ՝ Կոսովո, Սերբիա, Իսրայել, Իրան, Եգիպտոս և Եթովպիա։ Հիշեցնենք, որ նախկինում էլ նա բազմիցս շփոթել է Հայաստանի ու Ադրբեջանի անունները՝ օգտագործելով «Ալբանիա» և «Աբեր-բայջան» ձևակերպումները։

Իրանի հնարավոր դուրս գալը միջուկային զենքի չտարածման ռեժիմից

Եվրաեռյակի՝ Մեծ Բրիտանիայի, Գերմանիայի և Ֆրանսիայի պատժամիջոցներից հետո Իրանը հայտարարել է, որ պատրաստվում է խորհրդարանում քննարկել միջուկային զենքի չտարածման պայմանագրից դուրս գալու հարցը։ Եթե դա տեղի ունենա, ապա կշարունակվեն ուրանի հարստացման աշխատանքները՝ միջուկային մարտագլխիկների ստեղծման հնարավորությամբ։ Վերջին օրերին Իրանը նաև հաջողությամբ փորձարկել է միջմայրցամաքային բալիստիկ հրթիռ, որը, ըստ փորձագետների, ունակ է հաղթահարել Իսրայելի և ԱՄՆ հակահրթիռային պաշտպանությունը։

«Սրբազան երկխոսություն» ցուցահանդեսը Երևանում

Սեպտեմբերի 21-ին Հայաստանի պատմության թանգարանում բացվել է «Սրբազան երկխոսություն. Լուվրից Հայաստանի պատմության թանգարան» միջազգային ցուցահանդեսը։ Այն անցկացվում է ՀՀ անկախության օրվա միջոցառումների շրջանակում։ Ցուցադրության ընթացքում մեկ սրահում ներկայացվում են Լուվրի և Հայոց պատմության թանգարանի եզակի ցուցանմուշներ։ Ցուցադրությունը կգործի մինչև 2026 թվականի մարտի 21-ը։

Հայաստանի և Ադրբեջանի ժյուրիի փոխադարձ գնահատականները

Ղազախստանում անցկացված «Silk Way Star» միջազգային երաժշտական մրցույթում հայ և ադրբեջանցի ժյուրիի անդամները միմյանց մասնակիցներին տվեցին ամենաբարձր՝ 10 միավոր։ Հայ կատարող Սարո Գևորգյանը ստացավ 10 միավոր ադրբեջանցի ժյուրիից, իսկ ադրբեջանցի մասնակից Սաբինա Զադեն՝ նույն գնահատականը հայ ժյուրիից։ Սա առաջին դեպքն է, երբ միջազգային մրցույթում կողմերը միմյանց գնահատել են այս մակարդակով։

Թուրքիան վերացրել է լրացուցիչ մաքսատուրքերը ամերիկյան ապրանքների համար

Թուրքիայի իշխանությունները հայտարարեցին 2018 թվականին սահմանված լրացուցիչ մաքսատուրքերի վերացման մասին։ Որոշումը վերաբերում է 33 ապրանքատեսակի՝ այդ թվում ալկոհոլ, ծխախոտ, ավտոմեքենաներ և կոսմետիկա։ Մաքսատուրքերի չեղարկումը համընկել է նախագահ Էրդողանի՝ ԱՄՆ կատարած այցի հետ։

Դոնեցկում գիշերային հրետակոծություն

Դոնեցկի Կույբիշևսկի շրջանում գիշերային հրետակոծության հետևանքով տուժել է երկու քաղաքացի, վնասվել են բնակելի տներ և առևտրային օբյեկտներ։ Ռուսական կողմը շարունակ պնդում է, որ Ուկրաինան հարվածներ է հասցնում սահմանամերձ տարածքներին։

ՀՀ ՊՆ-ն՝ ՆԱՏՕ սեմինարում

ՀՀ պաշտպանության նախարարությունը հայտնել է, որ մշտական հիմունքներով ստանում է խորհրդատվական աջակցություն Ֆրանսիայից և ԱՄՆ-ից, ինչպես նաև Հունաստանից։ Աջակցությունը վերաբերում է ԶՈւ կառուցվածքի արդիականացմանը, ռազմավարական փաստաթղթերի մշակմանը և կրթական կարողությունների զարգացմանը։ Այս մասին հայտարարվել է ՆԱՏՕ-ի խորհրդարանական վեհաժողովի 108-րդ «Ռոուզ-Ռոթ» սեմինարի ընթացքում։

ՊՆ «Թեժ գիծ» ծառայության ժամանակավոր դադար

ՀՀ պաշտպանության նախարարության «Թեժ գիծ» ծառայությունը մինչև սեպտեմբերի 23-ը չի գործի։ Պատճառն արդիականացման և վերազինման աշխատանքներն են։

Ներառական խաղահրապարակ Երևանում

Երևանի քաղաքապետարանը Հայաստանի անկախության տոնի առթիվ մայրաքաղաքում բացել է ամենամեծ ներառական խաղահրապարակը։ Այն հնարավորություն կտա բոլոր երեխաներին՝ անկախ ֆիզիկական կարողություններից, խաղալ և զարգանալ։ Խաղահրապարակը կառուցվել է ժամանակակից տեխնոլոգիաներով ու բնական նյութերով։

Արտահանման նվազումը Հայաստանում

Ֆինանսների նախարար Վահե Հովհաննիսյանը հայտնել է, որ 2025-ի առաջին կիսամյակում արտահանումը նվազել է 52.8%-ով։ Սակայն հայկական ծագման ապրանքների արտահանումը աճել է 10.3%-ով։ Նվազման հիմնական պատճառը թանկարժեք մետաղների վերաարտահանման կտրուկ նվազումն է։

ԱՄՆ-ի ծրագիրը՝ ուրանի արտադրության համար

ԱՄՆ էներգետիկայի նախարարը հայտարարել է, որ երկիրը ծրագրում է արագ վերսկսել ուրանի հարստացման ներքին արտադրությունը։ Միևնույն ժամանակ, ԱՄՆ-ը դեռևս կախված է ռուսական մատակարարումներից, որոնց խափանումը սպառնալիք է ներկայացնում երկրի էներգետիկ ապահովության համար։

Հարավային Կորեայի նախագահի նախազգուշացումը

Հարավային Կորեայի նախագահ Լի Չժե Մյոնը զգուշացրել է, որ երկրի տնտեսությունը կարող է հայտնվել ծանր ճգնաժամում, եթե կառավարությունը ընդունի ԱՄՆ-ի ներկայիս պահանջները։ Նա նաև հանդես է եկել խաղաղ գոյակցության օգտին՝ ընդգծելով, որ պետք է խուսափել լարվածության սրումից։

Գենդերային աշխատավարձի տարբերությունները

Վերջին տվյալներով՝ գենդերային աշխատավարձի ամենամեծ տարբերությունը գրանցվել է Հարավային Կորեայում՝ 32.5%։ Հնդկաստանը հաջորդում է՝ 30.41%-ով, իսկ Ռուսաստանը՝ 30.36%-ով։ Ամենափոքր տարբերությունը գրանցվել է Ավստրալիայում (10.7%)։

Թուրքիայի խորհրդարանականի հայտարարությունը Երևանում

Թուրքիայի պատգամավոր Ֆաթմա Աքսալը Երևանում հայտարարել է, որ Հայաստանի, Թուրքիայի և Ադրբեջանի միջև հարաբերությունների կարգավորման նոր փուլ է սկսվել։ Նա ընդգծել է, որ գործընթացը ընթանում է երկխոսության միջոցով՝ առանց նախապայմանների։

Լևոտոբ հրաբխի ժայթքումը

Ինդոնեզիայում Լևոտոբ հրաբուխը 21-րդ անգամ ժայթքել է՝ մոխրի սյունը բարձրացնելով մինչև 3.6 կմ։ Իշխանությունները հորդորել են բնակիչներին հեռու մնալ վտանգավոր գոտիներից։

Հունաստան-Հնդկաստան համատեղ զորավարժություն

Միջերկրական ծովում մեկնարկել է Հունաստանի և Հնդկաստանի ռազմածովային ուժերի պատմության մեջ առաջին համատեղ զորավարժությունը «PASSEX» անունով։ Միջոցառումը կտևի մինչև սեպտեմբերի 18-ը։

Հյուսիսային Կորեայի նոր ծրագրերը

Կիմ Չեն Ընը հայտարարել է նոր գաղտնի զենքի ձեռքբերման մասին և նշել է, որ կառուցվում են նաև նոր կործանիչներ։ Միևնույն ժամանակ, նա պատրաստակամություն է հայտնել ԱՄՆ-ի հետ երկխոսության, եթե Վաշինգտոնը հրաժարվի ապամիջուկայնացման պահանջից։

ԱԱԾ տնօրենի այցը Բաքու

ԱԱԾ տնօրեն Անդրանիկ Սիմոնյանը վերադարձել է Բաքվից, որտեղ մասնակցել էր «Անվտանգության 3-րդ միջազգային ֆորումին»։ Այցի մանրամասները չեն հրապարակվել։

44-օրյա պատերազմի քննիչ հանձնաժողովի զեկույցը

Անդրանիկ Քոչարյանը հայտարարել է, որ հանձնաժողովի զեկույցը փոխանցվել է ԱԺ նախագահին։ Նա նշել է, որ զեկույցում բացահայտումներ են լինելու, որոնք պետք է դառնան դասեր ապագայի համար։

Ֆրանսիայի նախագահի հայտարարությունը Պաղեստինի մասին

Էմանուել Մակրոնը նշել է, որ պաղեստինա-իսրայելական հակամարտության խաղաղ կարգավորման միակ ուղին Պաղեստին պետության ճանաչումն է։ Նա հավելել է, որ չնայած ՀԱՄԱՍ-ի գործողությունները չի արդարացնում, սակայն պաղեստինցիները զուրկ են այլընտրանքից։

Քաղաքացիական ակցիա Երևանում

Երևանում մի խումբ քաղաքացիներ բողոքի ակցիա են անցկացրել՝ ընդդեմ Հայ Առաքելական Եկեղեցու դեմ իշխանությունների գործողությունների։ Ակցիայի ընթացքում պահանջվել է ազատ արձակել ձերբակալված երկու արքեպիսկոպոսներին։

Դպրոցներում բռնության կանխարգելման նոր քայլեր

ԿԳՄՍ փոխնախարարը հայտարարել է, որ բռնության և բուլինգի դեպքերի կանխարգելման ուղղությամբ իրականացվելու են մեծածավալ աշխատանքներ։ Նա նաև նշել է, որ այս ուսումնական տարում կստուգվի 6 տարեկանից բարձր երեխաների դասարան ընդունվելու նոր կարգի կիրառումը։

Բանկային ավանդների վիճակագրություն

2025 թ. հուլիսին բանկային ավանդների ծավալը հասել է 6.7 տրիլիոն դրամի՝ աճելով 13.9%-ով։ Ավանդների շուրջ 35%-ը ձևավորվել է արտարժույթով։

Աշխատողների թվաքանակի աճը Հայաստանում

2025 թ. հուլիսին Հայաստանում աշխատողների ընդհանուր թիվը կազմել է մոտ 796 հազար։ Սա 4.8%-ով ավելի է, քան նախորդ տարվա նույն ամսին։ Ամենաշատ աշխատողներ զբաղված են առևտրի և ավտոմեքենաների սպասարկման ոլորտում։

Փախստականների մասնագիտական դասընթացներ

Լեռնային Ղարաբաղից տեղահանված 44 անձ հաջողությամբ ավարտել են հրուշակագործության և կարուձևի դասընթացներ։ Դասընթացները կազմակերպվել են ՄԱԶԾ-ի և Ֆրանսիայի կառավարության աջակցությամբ։

Երեխաների խնամքի բարեփոխումները Հայաստանում

Վերջին տասը տարում Հայաստանում 24-ժամյա խնամքի հաստատություններում գտնվող երեխաների թիվը կտրուկ նվազել է՝ 2000-ից հասնելով 400-ի։ ՀՀ աշխատանքի և սոցիալական հարցերի նախարարը հայտարարել է, որ բարեփոխումները շարունակվելու են՝ երեխաների իրավունքների պաշտպանության նպատակով։