Սեպտեմբերի 18-ի բիզնես լուրերը

Տեղական

ՀՀ-ում հեղուկ վառելանյութի լիցքավորման կայանների անվտանգության միասնական համակարգ կստեղծվի
Կստեղծվի ավտոտրանսպորտային միջոցների հեղուկ վառելանյութի լիցքավորման կայանների կառուցվածքի, պահման, վաճառքի և փոխադրման տեխնիկական անվտանգության կառավարման միասնական համակարգ։ Կայանները համարվում են արտադրական վտանգավոր օբյեկտներ և ենթակա են փորձաքննության առնվազն տարին մեկ։ Նախագիծը մշակվել է՝ համադրելով ISO, ԵՄ և ԵԱՏՄ երկրների ստանդարտները։

21 անհետ կորած զինծառայողների ընտանիքները ևս 2 ամիս կստանան աջակցություն
44-օրյա պատերազմում անհետ կորած 21 զինծառայողների ընտանիքները օգոստոս և սեպտեմբեր ամիսներին ևս կստանան 300-հազարական դրամ աջակցություն։ Նախկինում աջակցության տրամադրումը դադարեցվել էր 2025թ. օգոստոսի 1-ից։

Հայաստանը հավանություն է տվել ԱՊՀ մաքսային փորձաքննությունների կենտրոնի մասին համաձայնագրին
Կառավարությունը հավանություն է տվել համաձայնագրին, որի նպատակն է բարձրացնել ԱՊՀ մաքսային մարմինների արդյունավետությունը, ամրապնդել տնտեսական անվտանգությունը և պայքարել մաքսային իրավախախտումների դեմ։ Կենտրոնը կգործի 5 տարի։

Երևանը կստանա 45 նոր տրոլեյբուս․ հին տրոլեյբուսներ այլևս չեն լինի մայրաքաղաքում
Կառավարության աջակցությամբ Երևանի քաղաքապետարանը ձեռք կբերի 45 նոր «Յու թոնգ» տրոլեյբուս և 104 վերելակ։ Մրցույթի արդյունքով արդեն գնվել է 30 տրոլեյբուս։ Տիգրան Ավինյանը հայտնել է, որ 2026-ի առաջին եռամսյակից հետո մայրաքաղաքում հին տրոլեյբուսներ այլևս չեն շահագործվի։

Միջազգային

ԱՄՆ Դաշնային պահուստային համակարգը նվազեցրել է տոկոսադրույքները
Ֆեդը տոկոսադրույքները նվազեցրել է 0.25 տոկոսային կետով՝ հասցնելով 4.00-4.25%-ի միջակայքին։ Որոշումը պայմանավորված է գործազրկության աճի ռիսկերով։ Հոկտեմբերին և դեկտեմբերին սպասվում են նոր նվազումներ։

ԱՄՆ-ում նվազել են նավթի և բենզինի պաշարները
Նավթի պաշարները մեկ շաբաթում նվազել են 9.29 մլն բարելով՝ հասնելով 415.4 մլն-ի։ Սա նվազման առավելագույն ցուցանիշն է հունիսից ի վեր։ Բենզինի պաշարները կրճատվել են ևս 2.35 մլն բարելով։

ԵՀ-ն առաջարկել է կասեցնել Իսրայելի հետ առևտրի արտոնյալ ռեժիմը
Առաջարկվող կասեցումը վերաբերում է մաքսային արտոնություններին և ազատ առևտրի պայմաններին։ Եթե այն ուժի մեջ մտնի, Իսրայելի ապրանքները ԵՄ-ում հարկվելու են այնպես, ինչպես ցանկացած այլ երրորդ երկրի ապրանքներ։

ՄԱԿ-ը նախատեսում է 2026-ի բյուջեն կրճատել 500 մլն դոլարով
Գլխավոր քարտուղար Անտոնիու Գուտերիշը առաջարկել է կրճատել կազմակերպության բյուջեն 15%-ով։ Փոփոխությունները կանդրադառնան նաև խաղաղապահ առաքելություններին։ Առաջարկվում է մի շարք գործառույթներ տեղափոխել ավելի էժան վայրեր։

Հետաքրքիր

Հայաստանում ռուսական բանկային քարտեր կընդունվեն
Ռուսաստանից զբոսաշրջիկների մեծ թվի պատճառով Հայաստանում շուտով կընդունվեն ռուսական «Միր» քարտերը և QR վճարումները։ Միայն այս տարվա հունվար-օգոստոս ամիսներին Հայաստան է այցելել ավելի քան 700 հազար ռուսաստանցի։