Ֆրանսիայում խուզարկություններ են իրականացվում X սոցիալական ցանցի գրասենյակներում

Դատախազությունը չի մանրամասնել հետաքննության առարկան կամ խուզարկությունների պատճառները։

Ֆրանսիայում իրավապահ մարմինների աշխատակիցները խուզարկություններ են իրականացնում X սոցիալական ցանցի ֆրանսիական գրասենյակներում։ Այս մասին հայտնել է Փարիզի դատախազությունը։

Պաշտոնական հաղորդագրության համաձայն՝ խուզարկությունները կազմակերպվել են Փարիզի դատախազության կիբերհանցագործությունների դեմ պայքարի բաժնի կողմից՝ ազգային ժանդարմերիայի կիբերհանցագործությունների դեմ պայքարի ստորաբաժանման և Եվրոպոլի հետ համատեղ։ Գործողությունները կատարվում են 2025 թվականի հունվարին մեկնարկած հետաքննության շրջանակում։

Դատախազությունը չի մանրամասնել հետաքննության առարկան կամ խուզարկությունների պատճառները։

Հիշեցվում է, որ հունվարին Ֆրանսիայի խորհրդարանի ստորին պալատը հավանություն է տվել օրինագծին, որը սահմանում է մինչև 15 տարեկան երեխաների համար սոցիալական ցանցերից օգտվելու արգելք։ Օրինագիծն ընդունվել է ձայների մեծամասնությամբ՝ 130 կողմ և 21 դեմ քվեարկությամբ։

Օրինագծի նպատակը սահմանված է որպես երեխաների և դեռահասների պաշտպանությունը սոցիալական հարթակների հնարավոր բացասական ազդեցություններից և էկրանային ժամանակի ավելցուկից։ Ֆրանսիայի նախագահ Էմանուել Մակրոնը հրապարակային հայտարարություններում անդրադարձել է նախաձեռնությանը՝ այն դիտարկելով որպես անվտանգությանն ուղղված քայլ և նշելով սոցիալական ցանցերի հնարավոր ազդեցությունը դեռահասների հոգեկան առողջության վրա։