Ասել, որ Հայաստանի ու Ադրբեջանի միջև ոչ մի խնդիր չկա՝ չափազանցություն է. ՀՀ ԱԳ նախարար

Նա շեշտել է, որ դեռ կան բազմաթիվ հումանիտար հարցեր։

ՀՀ արտաքին գործերի նախարար Արարատ Միրզոյանը ԱԺ արտաքին հարաբերությունների մշտական հանձնաժողովի հերթական նիստում անդրադարձել է հայ-ադրբեջանական հարաբերություններին՝ ընդգծելով, որ խաղաղության համաձայնագրի տեքստը արդեն համաձայնեցված է։

«Ասել, որ բոլոր հարցերը հարթված են, ոչ մի խնդիր չկա, անամպ է Հայաստանի ու Ադրբեջանի միջև խաղաղությունը՝ չափազանցություն է։ Ի վերջո տասնամյակների կոնֆլիկտ է եղել, այդքան արյուն է հեղվել, վերքերը թարմ են, դեռ ունենք Բաքվում պահվող անձինք»,- ասել է Արարատ Միրզոյանը՝ հավելելով, որ միմյանց նկատմամբ թշնամությունը հասարակությունների, երկու երկրների իշխանությունների, նաև ներկայացուցիչների տեքստերում աստիճանաբար նվազում է։

Նա շեշտել է, որ դեռ կան բազմաթիվ հումանիտար հարցեր՝ այդ թվում անհետ կորած անձանց ճակատագրերի պարզաբանումը։