Սահմանամերձ բնակավայրերում 16 մլն դրամ աջակցությամբ բնակարանային ծրագիրը կվերաբացվի

Ծրագրից կարող են օգտվել այն ընտանիքները, որոնք 2025 թվականի մայիսի 1-ի դրությամբ ստացել են շինարարության թույլտվություն կամ ձեռք են բերել հողամաս և բավարարում են գործող պայմաններին։

Սահմանամերձ և առանձին բնակավայրերում ընտանիքների բնակարանային մատչելիության ապահովման պետական աջակցության ծրագիրը կվերաբացվի։ Ծրագրի շրջանակում ընտանիքներին տրամադրվում է մինչև 16 մլն դրամ՝ սահմանամերձ գյուղական բնակավայրերում բնակելի տուն կառուցելու համար։

Աշխատանքի և սոցիալական հարցերի նախարարությունը հայտնել է, որ համապատասխան նախագիծը ներկայացվել է հանրային քննարկման e-draft իրավական ակտերի նախագծերի հրապարակման միասնական հարթակում։

Ովքեր կարող են օգտվել ծրագրից

Ծրագրից կարող են օգտվել այն ընտանիքները, որոնք 2025 թվականի մայիսի 1-ի դրությամբ ստացել են շինարարության թույլտվություն կամ ձեռք են բերել հողամաս և բավարարում են գործող պայմաններին։

Աջակցությունը կտրամադրվի նաև այն բնակավայրերում տուն կառուցող շահառուներին, որտեղ բնակչության և շահառուների թվի հարաբերակցությունը փոքր է 10%-ից՝ նպատակ ունենալով ապահովել 10% ցուցանիշը։ Յուրաքանչյուր բնակավայրի համար նախատեսված քվոտաների նվազագույն թիվը 10 է։

Ծրագրից կարող են օգտվել նաև այն ընտանիքները, որոնք տունը կկառուցեն այն բնակավայրերում, որտեղ կառուցված կամ կառուցվող դպրոցներում ազատ տեղերը գերազանցում են 50%-ը՝ ապահովելով ազատ տեղերի առնվազն 20%-ի համալրվածություն։ Այստեղ նույնպես յուրաքանչյուր բնակավայրի համար սահմանված է նվազագույնը 10 քվոտա։

Ծրագրի ազդեցությունը

Ծրագրի վերաբացումը միտված է սահմանամերձ բնակավայրերում բնակչության պահպանմանը և ներգրավմանը, ինչպես նաև սոցիալական ենթակառուցվածքների՝ մասնավորապես դպրոցների արդյունավետ օգտագործմանը։

Մանրամասները հասանելի են e-draft հարթակում։