ՌԴ քաղաքացիները չեն կարողանա 10-ից ավելի բանկային քարտ ունենալ

ՌԴ քաղաքացիները չեն կարողանա 10-ից ավելի բանկային քարտ ունենալ:

Ռուսաստանի քաղաքացիները այլևս չեն կարողանա ունենալ 10-ից ավելի բանկային քարտ։ Այս մասին հայտնել են կառավարության փոխվարչապետ Դմիտրի Գրիգորենկոյի աշխատակազմից՝ ընդգծելով, որ որոշումը ընդունվել է կիբերխարդախությունների դեմ միջոցառումների երկրորդ փաթեթի շրջանակում։

Ըստ աղբյուրի՝ փաթեթը ներառում է շուրջ 20 նախաձեռնություն։ Դրա մշակման մասին իշխանությունները տեղեկացրել էին դեռևս ձմռանը, իսկ այն պարունակում է տասնյակ փոփոխություններ։

Մասնավորապես, 2025 թվականի հունիսի 1-ից Ռուսաստանում արգելվել է օտարերկրյա մեսենջերների կիրառումը պետական և ֆինանսական կառույցներում՝ գաղտնի տեղեկատվության փոխանցման նպատակով։ Բացի այդ, ներդրվել են մի շարք սահմանափակումներ․ քաղաքացիները կարող են ինքնուրույն արգելել առցանց վարկերի և SIM-քարտերի ձևակերպումը, ինչպես նաև հրաժարվել SMS-հաղորդագրություններով հաշվետվություններից ու զանգվածային զանգերից։