Ռուսաստանը շահագրգռված է ինքնիշխան և ուժեղ Հայաստանի հարցում․ՌԴ դեսպան

Ռուսաստանը շարունակում է մնալ Հայաստանի առաջատար առևտրատնտեսական և ներդրումային գործընկերը։

Ռուսաստանը շահագրգռված է ինքնիշխան, ուժեղ և ինքնաբավ Հայաստանի հարցում։ Այս մասին հայտարարել է ՀՀ-ում ՌԴ դեսպան Սերգեյ Կոպիրկինը՝ դիվանագիտական աշխատողի օրվան նվիրված ընդունելության ժամանակ, փոխանցում է ՌԻԱ Նովոստին։

Դեսպանի խոսքով՝ Հայաստանի լիարժեք մասնակցությունը համատեղ ինտեգրացիոն միավորումներին նպաստում է այդ նպատակին։ Որպես օրինակ նա նշել է, որ Եվրասիական տնտեսական միությանը (ԵԱՏՄ) անդամակցության 10 տարիների ընթացքում Հայաստանի ՀՆԱ-ն աճել է 2,5 անգամ։

Կոպիրկինը նշել է, որ Հարավային Կովկասի տարածաշրջանը գտնվում է աշխարհաքաղաքական լարվածության պայմաններում, և այդ իրավիճակում Ռուսաստանի և Հայաստանի հարաբերությունները մտել են նոր փուլ՝ հարմարվելով փոփոխվող իրողություններին։

Նրա գնահատմամբ՝ առկա մարտահրավերների հաղթահարումը պահանջում է երկարաժամկետ քաղաքական կամք և ռազմավարական մոտեցում՝ երկկողմ փոխգործակցության կուտակված ներուժը պահպանելու և զարգացնելու համար։

Դեսպանը հույս է հայտնել, որ լրացուցիչ խթան կարող է ապահովել Հայաստանի Ազգային ժողովի նախագահ Ալեն Սիմոնյանի վերջերս Մոսկվա կատարած այցը։

Նրա խոսքով՝ անցած տարվա արդյունքները ցույց են տալիս, որ Ռուսաստանը շարունակում է մնալ Հայաստանի առաջատար առևտրատնտեսական և ներդրումային գործընկերը։ Նա նաև ընդգծել է Ռուսաստանի դերը Հայաստանի էներգետիկ և պարենային անվտանգության ապահովման հարցում։

Կոպիրկինը հավելել է, որ մշակութային-հումանիտար և միջանձնային կապերը շարունակում են ակտիվ մնալ, իսկ ռուս զբոսաշրջիկները զբաղեցնում են առաջատար դիրքեր ՀՀ այցելող օտարերկրյա զբոսաշրջիկների թվում։