ՌԴ-ն հույս ունի, որ գազատարների պայթյունները կբացահայտվեն. Պեսկով

Գերմանիան, Դանիան և Շվեդիան չեն բացառում դիվերսիայի տարբերակը:

Ռուսաստանը հույս է հայտնում, որ «Հյուսիսային հոսք 1» և «Հյուսիսային հոսք 2» գազատարների վրա 2022 թվականի սեպտեմբերի 26-ին տեղի ունեցած պայթյունների հետաքննությունը կավարտվի, և կբացահայտվեն ինչպես կատարողները, այնպես էլ պատվիրատուները. հայտարարել է ՌԴ նախագահի մամուլի խոսնակ Դմիտրի Պեսկովը: 

«Մենք ակնկալում ենք, որ հետաքննությունը կհասցվի ավարտին, և կբացահայտվեն ոչ միայն ահաբեկչությունն իրականացրած անձինք, այլև նրանք, ովքեր պատվիրել են այդ գործողությունները»,- ասել է Պեսկովը լրագրողների հետ զրույցում:

2022 թվականի սեպտեմբերի 26-ին պայթյուններ են տեղի ունեցել Ռուսաստանից Եվրոպա գազ մատակարարող «Հյուսիսային հոսք 1» և «Հյուսիսային հոսք 2» գազատարների վրա: Գերմանիան, Դանիան և Շվեդիան հայտարարել են, որ չեն բացառում նպատակային դիվերսիայի հավանականությունը: Գազատարների օպերատոր Nord Stream AG-ն նշել է, որ վնասները աննախադեպ են, և վերանորոգման ժամկետները դժվար է կանխատեսել:

Ռուսաստանի դատախազությունը քրեական գործ է հարուցել միջազգային ահաբեկչության հոդվածով:

Պեսկովը ընդգծել է, որ Ռուսաստանը բազմիցս խնդրել է տեղեկություններ պայթյունների վերաբերյալ, սակայն որևէ տվյալ չի ստացել: