«Ռոսատոմ»-ը հայտարարել է Հայաստանում ատոմակայանի կառուցման նախագիծը հնարավորինս շուտ սկսելու պատրաստակամության մասին

Քննարկվել է նաև Հայաստանում նոր ատոմային էներգաբլոկների կառուցման հնարավորությունը

Ռուսական «Ռոսատոմ» պետական կորպորացիան մտադիր է հնարավորինս սեղմ ժամկետներում սկսել Հայաստանում ատոմակայանի կառուցման նախագծի իրականացումը։ «Արմենպրես»-ի փոխանցմամբ՝ այս մասին «Իզվեստիա» թերթին հայտնել է Ռուսաստանի արտաքին գործերի փոխնախարար Միխայիլ Գալուզինը։

Նրա խոսքով՝ «Ռոսատոմ»-ը պատրաստ է արագ անցնել նախագծի գործնական փուլին՝ հաշվի առնելով հայկական կողմի դիրքորոշումն ու առաջնահերթությունները։ Գալուզինը նշել է, որ տեխնոլոգիական հուսալիության, ապացուցված փորձի և ֆինանսական պարամետրերի տեսանկյունից այլ իրական այլընտրանքներ ներկայում չեն դիտարկվում։

«Հաշվի առնելով ինչպես շինարարությունը, այնպես էլ հետագա շահագործումը, մասնագետների պատրաստման և վերապատրաստման անհրաժեշտությունը՝ առկա են վստահելի և մրցունակ լուծումներ», — նշել է փոխնախարարը։

Փետրվարի 6-ին «Ռոսատոմ» պետական կորպորացիայի գլխավոր տնօրեն Ալեքսեյ Լիխաչովը Մոսկվայում հանդիպել է ՀՀ Ազգային ժողովի նախագահ Ալեն Սիմոնյանի հետ։ ՏԱՍՍ-ի փոխանցմամբ՝ հանդիպման ընթացքում ներկայացվել են Հայկական ատոմային էլեկտրակայանի շահագործման ժամկետի երկարաձգման աշխատանքների ընթացիկ փուլերը։

Քննարկվել է նաև Հայաստանում նոր ատոմային էներգաբլոկների կառուցման հնարավորությունը՝ որպես միջուկային էներգետիկայի զարգացման երկարաժամկետ ուղղություն։

Հիշեցնենք, որ 2023 թվականին «Ռոսատոմ սերվիս»-ը և «Հայկական ԱԷԿ» ՓԲԸ-ն ստորագրել են համաձայնագիր, որի համաձայն Հայկական ատոմային էլեկտրակայանի շահագործման ժամկետը նախատեսվում է երկարաձգել մինչև 2036 թվականը։