Արգելափակումից դուրս է բերվել 300-ից ավելի ավտոմեքենա, օգնություն է ցուցաբերվել 1086 քաղաքացու

Ձնաբքի և վատ տեսանելիության պատճառով խցանման մեջ են հայտնվել հարյուրից ավելի տրանսպորտային միջոցներ։

Հունվարի 22-ին՝ ժամը 07։23-ին, Սյունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Շինուհայր գյուղի խաչմերուկի մոտակայքում ձնաբքի պատճառով ավտոմեքենա է արգելափակվել ձյան մեջ, և անհրաժեշտ է փրկարարների օգնությունը։

Դեպքի վայր են մեկնել ՆԳՆ ՓԾ մարզային փրկարարական վարչության և հրշեջ-փրկարարական ջոկատի օպերատիվ խմբերը, ինչպես նաև հրշեջ-փրկարարական ջոկատներից և Շինուհայրի հենակետից չորս մարտական հաշվարկ։

Տեղում պարզվել է, որ ձնաբքի և վատ տեսանելիության պատճառով խցանման մեջ են հայտնվել հարյուրից ավելի տրանսպորտային միջոցներ։

Օպերատիվ և ինտենսիվ աշխատանքների արդյունքում՝ ժամը 08։30-ից մինչև հունվարի 23-ի ժամը 00։20-ն ընկած ժամանակահատվածում, փրկարարներն արգելափակումից դուրս են բերել 34 բեռնատար, 311 մարդատար ավտոմեքենա և համապատասխան օգնություն ցուցաբերել 1086 քաղաքացու։

Տեղանքի առանձնահատկություններից ելնելով՝ փրկարարները շարունակաբար հերթապահություն են իրականացնում նշված ավտոճանապարհին, մշտապես հետևում օպերատիվ իրավիճակին և օգնության հասնում ձնաբքի հետևանքով արգելափակված քաղաքացիներին։