Երևանում կսկսվեն հեղեղատար համակարգերի վերակառուցումը

50 հասցեներում արդեն պատրաստ են նախագծա-նախահաշվային փաստաթղթերը:

Հուլիսի 25-ին Երևանում տեղի ունեցած հորդառատ անձրևը գերազանցել է ամսական տեղումների նորման՝ պատճառելով հեղեղումներ և վնասներ տարբեր հատվածներում։

Երևանի քաղաքապետարանի գործակարգավարական նիստում քաղաքապետի խորհրդական Կամո Արեյանը հայտնել է, որ համաձայն Հիդրոմետ ծառայության տվյալների՝ հուլիսի տեղումների նորման մայրաքաղաքում կազմում է 9 մմ, մինչդեռ ընդամենը 20 րոպեում տեղացել է 18 մմ՝ նորմայից կրկնակի ավելի։

Այս ինտենսիվ տեղումների հետևանքով կարճ ժամանակում հեղեղվել են փողոցներ, մայթեր, ստորգետնյա տրանսպորտային հանգույցներ։ Գրանցվել է 20 արտակարգ դեպք՝ ներառյալ ծառերի և էլեկտրասյուների տապալման 15 և 25 դեպք, մալուխների բռնկումներ, տանիքների ջրահորդման խողովակների վթարներ, քարաթափումներ։ Խնդրահարույց են դարձել Հաղթանակի կամուրջը, Քրիստափորի և Գյուրջյան փողոցները, ինչպես նաև Գործարանային մետրոյի հատվածը։

Քաղաքում անձրևատար համակարգի բացակայող և վերակառուցման ենթակա հատվածները գույքագրված են։ 50 հասցեներում արդեն պատրաստ են նախագծա-նախահաշվային փաստաթղթերը՝ ընդհանուր արժեքը կազմելով շուրջ 10 միլիարդ 88 միլիոն դրամ։ Նախատեսվում է վերակառուցել շուրջ 52.7 կմ համակարգ։

Քաղաքապետ Տիգրան Ավինյանը նշել է, որ նախագիծը համաձայնեցված է Կառավարության հետ, և այս տարի մեկնարկելու են համակարգերի վերակառուցման առաջին աշխատանքները։