ՌԴ դեսպանը ներկայացրել է ԵԱՏՄ-ին Հայաստանի անդամակցության տնտեսական օգուտները

ԵԱՏՄ-ին Հայաստանի անդամակցության տնտեսական օգուտներն ակնհայտ են։

Հայաստանում Ռուսաստանի Դաշնության արտակարգ և լիազոր դեսպան Սերգեյ Կոպիրկինը խոսել է Եվրասիական տնտեսական միությանը (ԵԱՏՄ) Հայաստանի անդամակցության արդյունքում գրանցված տնտեսական ցուցանիշների մասին՝ միաժամանակ կասկած հայտնելով, թե Եվրամիությունը կարող է ապահովել նույն մակարդակի տնտեսական զարգացում։

«Այն տարիների ընթացքում, երբ Հայաստանը հանդիսանում է ԵԱՏՄ լիիրավ անդամ, նրա համախառն ներքին արդյունքը ավելացել է շուրջ 2,5 անգամ»,– ասել է դեսպանը «Россия-24» հեռուստաալիքին տված հարցազրույցում։

Կոպիրկինի խոսքով՝ անցած տարվա առաջին 10 ամիսների ընթացքում Հայաստանի արտահանման ընդհանուր ծավալը կազմել է 6,4 միլիարդ դոլար, որից 2,6 միլիարդը բաժին է ընկել ԵԱՏՄ երկրներին։ Այդ արտահանման հիմնական ուղղությունը եղել է Ռուսաստանը, որի մասնաբաժինը կազմել է Հայաստանի ընդհանուր արտահանման շուրջ 37 տոկոսը։

Դեսպանը նշել է, որ ԵԱՏՄ-ին Հայաստանի անդամակցության տնտեսական օգուտներն ակնհայտ են և հարց բարձրացրել, թե արդյոք Եվրամիությունը կարող է երաշխավորել հանրապետության համար տնտեսական և սոցիալական զարգացման նույն որակը։