2025 թվականի արդյունքներով Հայաստանի Հանրապետության պետական պարտքը կազմել է 14 մլրդ 531 մլն դոլար։ Այս մասին Ազգային ժողովի ֆինանսավարկային և բյուջետային հարցերի մշտական հանձնաժողովի արտահերթ նիստի ժամանակ հայտարարել է ֆինանսների նախարար Վահե Հովհաննիսյանը։
Պարտքի կառուցվածքը և դրամայնացումը
Գերատեսչության ղեկավարի փոխանցմամբ՝ պետական պարտքի կազմում շարունակում է մեծանալ դրամային և ներքին պարտքի կշիռը։ Մասնավորապես, ներքին պարտքի տեսակարար կշիռը նախորդ տարվա 52%-ից աճել է և հասել 53%-ի։ Միևնույն ժամանակ, շուկայում տոկոսադրույքների բարձր մակարդակով պայմանավորված, արձանագրվել է միջնաժամկետ պարտքի շարունակական աճ։
Անդրադառնալով այն քննադատություններին, թե կառավարությունը նոր պարտքային միջոցներ է ներգրավում ընթացիկ ծախսերը հոգալու համար՝ նախարարը հերքել է այդ թեզը՝ ներկայացնելով կոնկրետ թվային հաշվարկ.
«Մեր կողմից կատարված կապիտալ ծախսերը 283 միլիարդ դրամով ավելի են եղել, քան մեր ներգրաված նոր պարտքը։ Սա ապացուցում է, որ պարտք վերցնելով ընթացիկ ծախսեր չենք անում»,- ընդգծել է Վահե Հովհաննիսյանը։
Բյուջեի կառուցվածքային փոփոխությունները և ՀՆԱ-ի հարաբերակցությունը
վերջին տարիներին Հայաստանին հաջողվել է էապես փոխել բյուջետային ծախսերի որակական կազմը։ 2025 թվականին կապիտալ ծախսերն աճել են՝ հասնելով ՀՆԱ-ի 6.2%-ին։ Դրանք հիմնականում ուղղվել են երեք ռազմավարական ուղղություններով.
Մարդկային կապիտալի զարգացում,
Անվտանգային համակարգեր,
Տնտեսական ենթակառուցվածքներ։
Եթե համեմատենք 2021 թվականի ցուցանիշների հետ, ապա կապիտալ ծախսերն աճել են 3.1 տոկոսային կետով, մինչդեռ ընթացիկ (պահպանման) ծախսերը միաժամանակ նվազել են 2.8 տոկոսային կետով։ Վերջին 5 տարիներին բյուջեի պակասորդը (դեֆիցիտը) միջինում կազմել է 3.2%։
Տնտեսական աճի և արդյունավետ կառավարման հետևանքով՝ ՀՆԱ-ի համեմատությամբ պետական պարտքի հարաբերակցությունը նվազել է՝ կազմելով 47.3%։ Որպես առաջիկա հիմնական թիրախ՝ Ֆինանսների նախարարությունը նպատակադրել է պետական եկամուտների մեջ պարտքի սպասարկման (տոկոսավճարների) կշիռը ներկայիս 12.1%-ից նվազեցնել և հասցնել 10%-ի։
