Ապրանքների հետագծելիությունն ավելի կհստակեցվի․ հաշվարկային փաստաթղթերում ԱՏԳ ԱԱ ծածկագրերը լրացնելը կդառնա պարտադիր

ՀՀ հարկային օրենսգրքում կատարված փոփոխություններով` այս տարվա սեպտեմբերի 1-ից սկսած փուլ առ փուլ կներդրվի հաշվարկային փաստաթղթերում ապրանքների ԱՏԳ ԱԱ ծածկագրերը պարտադիր լրացնելու գործընթացը։ Նպատակը ՀՀ ներմուծվող, ՀՀ-ում արտադրվող կամ վաճառվող ապրանքների հետագծելիության ապահովումն է։

Համապատասխան ծրագրային աշխատանքներն արդեն ավարտված են, իսկ ծածկագրերի լրացման դեպքերը, կարգն ու ժամկետները սահմանված են Կառավարութան որոշմամբ։ Ծածկագրերը պետք է նշել՝ հիմնվելով Եվրասիական տնտեսական հանձնաժողովի խորհրդի 2021թ․ սեպտեմբերի 14-ի թիվ 80 որոշմամբ հաստատված միասնական ապրանքային անվանացանկի վրա։ Ծածկագրերը լրացվելու են առանձին սյունակով, որտեղ տնտեսվարողը պարտավոր է նշել ապրանքի ծածկագիրը՝ 4 նիշի մակարդակով։ Միաժամանակ, հաշվարկային փաստաթղթում պարտադիր է նաև ապրանքի անվանման լրացումը, որը պետք է լինի հստակ և համապատասխանի տվյալ ապրանքի նկարագրությանը, որպեսզի ապահովվի ապրանքի նույնականացումը։

Սեպտեմբերի 1-ից (առաջին փուլով) հաշվարկային փաստաթղթերում ԱՏԳ ԱԱ ծածկագրերի լրացումը պարտադիր է Հայաստան ներմուծված ապրանքների համար։ Մասնավորապես, եթե ապրանքը ներմուծվել է «Բաց թողնում՝ ներքին սպառման համար» մաքսային ընթացակարգով կամ ԵԱՏՄ անդամ այլ պետությունից և այն վաճառվում կամ մեկ հասցեից մյուս հասցե է տեղափոխում ներմուծող հարկ վճարողը, ապա հաշվարկային փաստաթղթերում ԱՏԳ ԱԱ ծածկագրերի լրացումը պարտադիր է։

Սեպտեմբերի 1-ից հաշվարկային փաստաթղթերում ԱՏԳ ԱԱ ծածկագրերը լրացնելու պահանջը վերաբերում է նաև նույնականացման միջոցներով դրոշմավորման ենթակա ծխախոտային և ալկոհոլային արտադրանքի վաճառքի կամ տեղափոխման դեպքերին։

Նոյեմբերի 1-ից սկսած  հաշվարկային փաստաթղթերում ԱՏԳ ԱԱ ծածկագրերը լրացնելը պարտադիր կլինի նաև Հայաստանում արտադրված ապրանքների մատակարարումների կամ տեղափոխումների դեպքում, եթե ամբողջ գործընթացն իրականացնելու է արտադրողը։

Իսկ 2026թ. հունվարի 1-ից հաշվարկային փաստաթղթերում ԱՏԳ ԱԱ ծածկագրերը լրացնելու պահանջը կընդլայնվի՝ ընդգրկելով ապրանքների մատակարարման կամ տեղափոխման բոլոր գործարքները։

Միաժամանակ, Պետական եկամուտների կոմիտեն հիշեցնում է, որ չսպասելով պարտադիր ժամկետներին՝ տնտեսվարողները կարող են իրենց ցանկությամբ 2025 թ․ սեպտեմբերի 1-ից սկսած դուրս գրվող հաշվարկային փաստաթղթերում լրացնել ապրանքների ԱՏԳ ԱԱ ծածկագրերը։