Ապրանքի վերադարձի դեպքում գործարքի ճշգրտումը կհեշտացվի

Նախագիծը վերաբերում է հարկ վճարողների լայն շրջանակի։

Ապրանքի վերադարձի դեպքում գործարքի ճշգրտման հնարավորություն կսահմանվի բոլոր այն դեպքերում, երբ տվյալ ապրանքը ենթակա է վերադարձման։ Այս մասին ԱԺ նիստում հայտարարել է ՊԵԿ նախագահ Էդուարդ Հակոբյանը՝ ներկայացնելով Հարկային օրենսգրքում փոփոխությունների նախագիծը։

Նրա խոսքով՝ ներկայում որոշ դեպքերում, օրինակ՝ պիտանելիության ժամկետ չունեցող ապրանքների վերադարձի ժամանակ, գործարքի ճշգրտում հնարավոր չէ, և այն ձևակերպվում է որպես հետվաճառք։

Սա, ըստ Հակոբյանի, խեղաթյուրում է գործարքի իրական տրամաբանությունը։

Առաջարկվող փոփոխությամբ նախատեսվում է, որ նման բոլոր դեպքերում հնարավոր կլինի իրականացնել գործարքի ճշգրտում՝ առանց այն վերաձևակերպելու որպես նոր վաճառք։

Նախագիծը վերաբերում է հարկ վճարողների լայն շրջանակի։

Փոփոխություններ են նախատեսվում նաև հարկային հաշիվների մասով։

Եթե հարկ վճարողը սխալ է լրացրել հարկային հաշիվը և այն չեղարկվում է, ապա նոր հարկային հաշիվ դուրս գրելիս ԱԱՀ գումարը հնարավոր կլինի հաշվանցել նույն հաշվետու ժամանակաշրջանում։

Սա թույլ կտա խուսափել լրացուցիչ տույժերից, որոնք ներկայում կարող են առաջանալ նման դեպքերում։