Վարչապետը ներկայացրել է օնլայն խարդախության վերաբերյալ քաղաքացուց ստացված հաղորդում

Փոխանցումը կատարած անձին հայտնել են, որ գումարը իբր սխալ է կանխիկացվել։

Հայաստանի վարչապետ Նիկոլ Փաշինյանը հրապարակել է քաղաքացուց ստացված նամակի բովանդակությունը, որը վերաբերում է օնլայն խարդախության դեպքին։

Հաղորդման համաձայն՝ 2025 թվականի հունիսի 7-ից հունիսի 9-ն ընկած ժամանակահատվածում քաղաքացուն «Տելեգրամ» հավելվածի միջոցով կապ են հաստատել «Alisa» և «Arammita» բաժանորդները՝ առաջարկելով օնլայն գումար վաստակելու տարբերակ։ Առաջարկի շրջանակում քաղաքացին պետք է կատարեր գումարային փոխանցումներ և փոխարենը ստանար շահույթ։

Ներկայացված տվյալների համաձայն՝ սկզբնական փուլում քաղաքացուն առաջարկվել է 2 000 դրամ փոխանցել նշված քարտային հաշվեհամարին, ինչից հետո նրա հաշվին վերադարձվել է 3 000 դրամ։ Այնուհետև կատարվել են հաջորդական փոխանցումներ՝ 26 000 դրամի դիմաց ստացվել է 37 000 դրամ։

Հաղորդման մեջ նշվում է, որ դրանից հետո քաղաքացին նույն հաշվեհամարին փոխանցել է ընդհանուր 2 419 724 դրամ, սակայն այդ գումարը հետ չի վերադարձվել։ Փոխանցումը կատարած անձին հայտնել են, որ գումարը իբր սխալ է կանխիկացվել։

Վարչապետի հրապարակած տեղեկատվությունը վերաբերում է օնլայն խարդախությունների տարածված մեխանիզմներից մեկին, որի շրջանակում սկզբնական փոքր փոխանցումների միջոցով ձևավորվում է վստահություն, իսկ հետագայում կատարվում են խոշոր գումարային փոխանցումներ։