Նախակրթարաններում ընդունելության տարիքային շեմը նվազեցվել է

Միաժամանակ նվազել է այն բնակավայրերի թիվը, որտեղ առհասարակ չի գործում նախադպրոցական հաստատություն՝ 229-ից հասնելով 87-ի։

ՀՀ-ում նախադպրոցական կրթության հասանելիության ընդլայնման նպատակով կատարվել են օրենսդրական փոփոխություններ, որոնցով վերանայվել է նախակրթարաններում երեխաների ընդունելության տարիքային շեմը։

ԿԳՄՍ նախարարության տվյալներով՝ նոր կարգավորմամբ որոշ բնակավայրերում նախակրթարաններում կարող են ընդգրկվել 3-6 տարեկան երեխաներ, իսկ այն վայրերում, որտեղ գործում են նաև մանկապարտեզներ՝ 4-6 տարեկան երեխաներ։

Նախկինում նախակրթարաններում ընդունվում էին միայն 5-6 տարեկան երեխաներ։

Փոփոխությունը պայմանավորված է այն հանգամանքով, որ մի շարք բնակավայրերում նախակրթարանները հանդիսանում են նախադպրոցական կրթության միակ հասանելի ձևը, իսկ մանկապարտեզների կարողությունները չեն բավարարում պահանջարկին։

Հանրապետությունում գործում է շուրջ 500 նախակրթարան, որոնք հիմնականում տեղակայված են դպրոցներին կից և գործում են կարճատև՝ օրական 4-5 ժամ ծրագրով։

Պաշտոնական տվյալներով՝ 3-5 տարեկան երեխաների ընդգրկվածությունը նախադպրոցական կրթությունում աճել է՝ 2021 թվականի 64.3%-ից հասնելով 81%-ի։

Միաժամանակ նվազել է այն բնակավայրերի թիվը, որտեղ առհասարակ չի գործում նախադպրոցական հաստատություն՝ 229-ից հասնելով 87-ի։

Կառավարության ծրագրով նախատեսվում է նաև նոր մանկապարտեզների կառուցում․ արդեն ավարտվել են աշխատանքները 301 հաստատությունում։

Կարգավորումները նպատակ ունեն ընդլայնել նախադպրոցական կրթության հասանելիությունը և բարձրացնել ընդգրկվածության մակարդակը ամբողջ հանրապետությունում։