Perplexity-ն առաջարկել է Google-ին վաճառել Chrome դիտարկիչը:

Արհեստական բանականության ոլորտում գործող Perplexity ստարտափը հանդես է եկել անսպասելի առաջարկով՝ գնել Google-ի Chrome դիտարկիչը 34.5 միլիարդ դոլարով։ Այս գումարը գրեթե երկու անգամ գերազանցում է ստարտափի ներկայիս գնահատված արժեքը՝ 18 միլիարդ դոլար։ Ընկերության հայտարարության համաձայն, գործարքի ֆինանսավորումը պատրաստ են ապահովել մի քանի խոշոր վենչուրային ֆոնդեր։

Առաջարկը արվել է այն պահին, երբ Google-ը, որը մտնում է Alphabet Inc.-ի կազմի մեջ, պարտվել է հակամենաշնորհային գործում՝ առցանց որոնման շուկայում գերիշխող դիրքի պատճառով։ Ամերիկյան դատարանի սպասվող որոշումը կարող է պարտադրել ընկերությանը իրականացնել շուկայի մրցակցային միջավայրը վերականգնելու քայլեր, որոնցից ամենածայրահեղը Chrome դիտարկիչի վաճառքն է։ Այս տարբերակին աջակցում է նաև ԱՄՆ արդարադատության նախարարությունը։

Perplexity-ի համահիմնադիր Արավինդ Սրինիվասը իր նամակում Alphabet-ի գլխավոր գործադիր տնօրեն Սունդար Պիչային նշել է, որ առաջարկն ուղղված է հակամենաշնորհային պահանջների կատարմանը և Chrome-ի փոխանցմանը փորձառու ու անկախ օպերատորի։ Alphabet-ը պաշտոնական մեկնաբանություն չի տվել։

Financial Times-ի տեղեկացմամբ՝ ընկերության ներսում այս առաջարկը լուրջ չի դիտարկվում։ Նշենք, որ սա Perplexity-ի առաջին նման փորձը չէ․ այս տարվա սկզբին ընկերությունը պատրաստակամություն էր հայտնել գնել TikTok-ը 50 միլիարդ դոլարով, սակայն գործարքը չի կայացել։