Պենտագոնը 5 միլիարդ դոլարի պայմանագիր է կնքել Raytheon-ի հետ՝ Coyote անօդաչու թռչող սարքերի արտադրության համար

Պայմանագրի ավարտը նախատեսվում է մինչև 2033 թվականի սեպտեմբերի 28-ը:

Պենտագոնը Raytheon ընկերության հետ, որը սպառազինությունների ամերիկյան խոշոր արտադրող RTX Corporation-ի դուստր ստորաբաժանումն է, 5 մլրդ դոլարի պայմանագիր է կնքել՝ Coyote անօդաչու թռչող սարքերի (ԱԹՍ) մատակարարման համար: Այս մասին ասվում է ամերիկյան ռազմական գերատեսչության հրապարակած ծանուցման մեջ ։ 

Փաստաթղթի համաձայն՝ միջոցներ են հատկացվում հրթիռային արձակման համակարգերի, անօդաչու թռչող սարքերի և ռադարային կայանների արտադրության համար: Ճշգրիտ ծավալները չեն նշվում: Պայմանագրի ավարտը նախատեսվում է մինչև 2033 թվականի սեպտեմբերի 28-ը:

Հիշատակված միանվագ օգտագործման անօդաչուն հասանելի է երկու տարբերակով. թշնամու ԱԹՍ-ները խոցելու և խափանումների սարք, հետախուզման, դիտարկման և թիրախավորման միջոց, կապի ռետրանսլյատոր և ցամաքային թիրախներին հարվածներ հասցնելու գործիք ծառայելու համար։

Օգոստոսին Պենտագոնի ղեկավար Փիթ Հեգսեթը հայտարարել է, որ հանձնարարել է ԱՄՆ բանակին ստեղծել միջգերատեսչական աշխատանքային խումբ՝ անօդաչու թռչող սարքերի դեմ պայքարելու համար։ Նա նշել է, որ Վաշինգտոնը հույս ունի «առաջ անցնել իր մրցակիցներից» այս ոլորտում։

Հունիսի սկզբին Վաշինգտոնի վարչակազմի ղեկավար Դոնալդ Թրամփը հրամանագիր է ստորագրել, ըստ որի՝ ԱՄՆ Դաշնային ավիացիոն վարչությունը պետք է արագացնի ամերիկյան տեխնոլոգիաների մշակումն ու փորձարկումները՝ դրոնների արտադրությունն ու արտահանումն ավելացնելու նպատակով։ Բացի այդ, նա կարգադրել էր ուժեղացնել ժամանակակից ԱԹՍ-ներից պաշտպանությունը։ Հուլիսին Fox News հեռուստաալիքը հայտնել է, որ Հեգսեթը կարգադրել է արագացնել անօդաչուների արտադրությունն ու տեղակայումը, փորձելով այս ոլորտում առաջ անցնել Ռուսաստանից և Չինաստանից։ Թրամփը բազմիցս նշել է, որ ԱՄՆ ԶՈւ-ն ուսումնասիրում են անօդաչուների կիրառման փորձը՝ Ուկրաինայում մարտական գործողությունների ընթացքում։