ՊԵԿ-ը բացահայտել է Հայաստան թմրամիջոցների մաքսանենգ ներմուծման դեպք

Ձերբակալվածների բնակության վայրերում իրականացվել են խուզարկություններ։

Պետական եկամուտների կոմիտեն հայտնում է, որ միջազգային գործընկերների հետ համագործակցության շրջանակում բացահայտվել է Հայաստան թմրամիջոցների մաքսանենգ ներմուծման դեպք։

Օպերատիվ տվյալների հիման վրա պարզվել է, որ Նիդերլանդների Թագավորության քաղաքացի Ռ․Դ․-ն Վիեննա–Երևան չվերթով ժամանել է Հայաստան և հնարավոր է իր հետ ապօրինի ներմուծել թմրամիջոցներ։ Ձեռնարկված միջոցառումների արդյունքում քաղաքացին հայտնաբերվել է Երևան քաղաքի հյուրանոցներից մեկում և հրավիրվել մաքսային հսկողության գոտի, որտեղ ենթարկվել է ռենտգենային սկանավորման միջոցով անձնական մաքսային զննման։

Զննման արդյունքում քաղաքացու որովայնի շրջանում հայտնաբերվել են կասկածելի օտար մարմիններ, ինչից հետո նա տեղափոխվել է «Արմենիա» հանրապետական բժշկական կենտրոն։ Բժշկական միջամտության արդյունքում քաղաքացու մարմնից դուրս է բերվել «կոկաին» տեսակի թմրամիջոց՝ ընդհանուր 845 գրամ քաշով 50 պատիճի տեսքով։ Նշված հանգամանքների հիմքով Ռ․Դ․-ն ձերբակալվել է։

Հետագա օպերատիվ-հետախուզական միջոցառումները իրականացվել են ՊԵԿ մաքսանենգության դեմ պայքարի վարչության և ԱԱԾ տնտեսական անվտանգության և կոռուպցիայի հակազդման գլխավոր վարչության համատեղ ուժերով։ Պարզվել է, որ թմրամիջոցների ներմուծումը և ՀՀ տարածքում դրանց հետագա իրացումը հնարավոր է կազմակերպվել է մի քանի անձանց կողմից։

«Վերահսկելի մատակարարում և գնում» օպերատիվ միջոցառման շրջանակում Երևանի հասցեներից մեկում ձերբակալվել է ևս երկու քաղաքացի՝ Ա․Պ․-ն և Ս․Մ․-ն։ Բոլոր երեք անձինք ներկայացվել են ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն։

Քրեական վարույթ է նախաձեռնվել ՀՀ քրեական օրենսգրքի 393-րդ և 399-րդ հոդվածների հատկանիշներով։ Ձերբակալվածների բնակության վայրերում իրականացվել են խուզարկություններ։

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։