Օպտիկական մալուխների վնասման պատճառով Միգրացիայի և քաղաքացիության ծառայության առցանց հարթակները ժամանակավորապես անհասանելի են

Կացության քարտի համար դիմող քաղաքացիները կարող են ստորագրել և ստանալ քարտը։

Ինտերնետ կապի օպտիկական մալուխների վնասման հետևանքով Միգրացիայի և քաղաքացիության ծառայության առցանց ծառայության հարթակները ժամանակավորապես անհասանելի են։ Այս մասին հայտարարություն է տարածել ՀՀ ՆԳՆ միգրացիայի և քաղաքացիության ծառայությունը։

Հայտարարությունում նշվում է, որ ծառայությանը կապ ապահովող մատակարարի մասնագետները ողջ ռեսուրսով աշխատում են խնդրի հնարավորինս արագ վերացման ուղղությամբ։

Վերոնշյալ տեխնիկական խնդրի պատճառով ներկայումս հնարավոր չէ ակտիվացնել էլեկտրոնային (թվային) ստորագրությունը։ Մասնավորապես, Վազգեն Սարգսյան հասցեում գործող Հանրային ծառայությունների միասնական գրասենյակ մոտեցող քաղաքացիների համար տեղում թվային ստորագրության ակտիվացում չի իրականացվի։

Միևնույն ժամանակ, խորհրդատվության համար մոտեցող քաղաքացիները կարող են դիմել գրասենյակ և ստանալ իրենց հետաքրքրող հարցերի պատասխանները։ Կացության քարտի համար դիմող քաղաքացիները կարող են ստորագրել և ստանալ քարտը, սակայն թվային ստորագրությունը ակտիվացնելու համար անհրաժեշտ կլինի կրկին այցելել ծառայություն՝ խնդրի կարգավորումից հետո։

Միգրացիայի և քաղաքացիության ծառայությունը քաղաքացիներին առաջարկում է հետևել իրենց պաշտոնական ֆեյսբուքյան էջին, որտեղ խնդրի լուծումից անմիջապես հետո կտարածվի համապատասխան տեղեկություն։