OpenAI-ի արժողությունը հասել է 500 մլրդ դոլարի. Reuters

2025-ի առաջին կեսին OpenAI-ն ունեցել է մոտ 4.3 մլրդ դոլար եկամուտ:

ChatGPT-ի ստեղծող OpenAI ընկերությունը այժմ գնահատվում է ավելի քան 500 մլրդ դոլար, հայտնում է Reuters-ը։ Սա տեղի է ունեցել այն բանից հետո, երբ ընկերության ներկայիս և նախկին աշխատակիցները շուրջ 6.6 մլրդ դոլարի բաժնետոմսեր են վաճառել ներդրողներին։

Ներդրողների թվում են Thrive Capital, SoftBank, Dragoneer Investment Group, Աբու Դաբիի MGX և T. Rowe Price։ Բացի այդ, ընկերությունը թույլատրել է ավելի քան 10 մլրդ դոլարի բաժնետոմսերի վաճառք նաև երկրորդային շուկայում։

Հիշեցնենք, որ տարվա առաջին կեսին OpenAI-ն արդեն գրանցել էր զգալի աճ․ ընկերության արժեքը հասել էր 300 մլրդ դոլարի, իսկ SoftBank-ը ներդրել էր 40 մլրդ դոլար։

Տնտեսական արդյունքներն էլ խոսուն են․ 2025-ի առաջին կեսին OpenAI-ն ունեցել է մոտ 4.3 մլրդ դոլար եկամուտ, ինչը 16%-ով ավելի է, քան ամբողջ նախորդ տարվա եկամուտը։ Ընկերության առաջատար արտադրանքը՝ ChatGPT-ն, ունի շուրջ 700 մլն օգտատեր, և այս տարվա եկամուտները կանխատեսվում են մինչև 13 մլրդ դոլար։

Չնայած Google-ի, Apple-ի և այլ մրցակիցների աճող ճնշմանը, OpenAI-ն շարունակում է մնալ արհեստական բանականության ոլորտի առաջատար խաղացողը։