1. Սեդրակ Քոչարյանը կալանավորվեց 2 ամսով. մեղադրանքներ են առաջադրվել նաև Սերժ Սարգսյանին
Հակակոռուպցիոն կոմիտեում քննվող փողերի լվացման և կաշառք ստանալու վարույթի շրջանակում ՀՀ երկրորդ նախագահ Ռոբերտ Քոչարյանի որդին՝ Սեդրակ Քոչարյանը, կալանավորվել է 2 ամսով:
Մանրամասներ. Գործով ձերբակալվել է 6 անձ, իսկ մեղադրանք է առաջադրվել 10 անձի: Մեղադրյալների թվում է նաև երրորդ նախագահ Սերժ Սարգսյանը՝ ծանր հետևանքներ առաջացրած պաշտոնեական լիազորությունները չարաշահելու համար:
2. Դատախազությունը պահանջում է անվավեր ճանաչել Գագիկ Ծառուկյանի անշարժ գույքի գործարքները
Գլխավոր դատախազությունը Հակակոռուպցիոն դատարան է ներկայացրել երկու հայց՝ ԲՀԿ առաջնորդ Գագիկ Ծառուկյանի և նրա հետ փոխկապակցված անձանց գույքերի վերաբերյալ:
Գույքերը. Հայցերը վերաբերում են «Առինջ մոլի» 3.5 հեկտար (օտարման ոչ ենթակա) հողատարածքին և Ծառուկյանների առանձնատան ավելի քան 14 հեկտար հողին: Դատարանն ընդունել է հայցերը և ժամանակավոր արգելանք դրել գույքերի վրա:
3. Վյաչեսլավ Վոլոդինի արձագանքը Հայաստանի արտաքին քաղաքականությանը
ՌԴ Պետդումայի նախագահ Վյաչեսլավ Վոլոդինը «ցինիկ» և «կեղծ» է անվանել Հայաստանի քաղաքականությունը:
Պատճառը. Ըստ ռուս պաշտոնյայի՝ Հայաստանը մի կողմից հայտարարում է Եվրամիությանն անդամակցելու մտադրության մասին, մյուս կողմից՝ շարունակում է օգտագործել ԵԱՏՄ ընձեռած հնարավորությունները:
4. ԱԺ նիստը. քննարկվում է Եվրոպական ինտեգրման հանձնաժողովի նախագահի ընտրությունը
Ազգային ժողովը շարունակում է աշխատանքները: Օրակարգում եվրոպական ինտեգրման հարցերի մշտական հանձնաժողովի նախագահի ընտրությունն է:
Թեկնածուն. Ընդդիմադիր «Հզոր Հայաստան» խմբակցությունն այդ պաշտոնում առաջադրել է Հարություն Հարությունյանի թեկնածությունը:
5. Կանադան 15-50% մաքսատուրքեր է սահմանում ԱՄՆ-ից ներկրվող ապրանքների վրա
Կանադայի ֆինանսների նախարարությունը հայտարարել է սեպտեմբերի 8-ից ԱՄՆ-ից ներկրվող շուրջ 20 մլրդ դոլարի ապրանքների նկատմամբ պատասխան մաքսատուրքեր կիրառելու մասին:
Ապրանքատեսակները. Մաքսատուրքերը տարածվում են ավտոմեքենաների, կենցաղային տեխնիկայի, թղթի և սարքավորումների վրա, իսկ պողպատի ու ալյումինի համար դրույքաչափը 25%-ից բարձրացվել է 50%-ի:
6. ԱՄՆ զինվորականների հարվածը Կարիբյան ծովում
Ամերիկյան զինուժը Կարիբյան ծովում հարված է հասցրել թմրանյութերի մաքսանենգության համար օգտագործվող նավին:
Հետևանքները. Հետախուզական տվյալներով հաստատված թիրախային հարվածի հետևանքով զոհվել է 4 մարդ:
