Հոկտեմբերի 6-ի բիզնես լուրերը

Տեղական

65 տարին լրացած լինելը այլևս չի համարվի աշխատանքային պայմանագրի լուծման հիմք
ԱՍՀ նախարարությունը հանրային քննարկման է ներկայացրել նախագիծ, որի համաձայն՝ պաշտոն զբաղեցնելու առավելագույն տարիքի սահմանափակումները կհանվեն։ Փոփոխությունը հնարավորություն կտա նաև 65 տարին լրացած անձանց շարունակել աշխատանքը քաղաքացիական և համայնքային ծառայության, ՊՈԱԿ-ների ղեկավարների և այլ պաշտոններում։

Երևանի շինհրապարակների կահավորումը կազդի կառուցապատողների վրա
Քաղաքապետ Տիգրան Ավինյանի խոսքով՝ շինհրապարակները պատշաճ չկահավորելու դեպքում կառուցապատողները զրկվելու են մի շարք արտոնություններից։ Անցած շաբաթ արձանագրվել է 81 խախտում ապօրինի շինությունների և հողազավթման դեպքերով։

Քաղաքացու եկամուտների հայտարարագիրը որոշ դեպքերում ավտոմատ կհամարվի լրացված
Նոր նախագծով՝ այն քաղաքացիները, որոնց եկամուտների վերաբերյալ ամբողջ տեղեկատվությունը հասանելի է ՊԵԿ-ին, այլևս կարիք չեն ունենա մուտք գործելու համակարգ։ Նոյեմբերի 1-ից հետո նման հայտարարագրերը կհամարվեն լրացված՝ առանց լրացուցիչ գործողությունների։

Զվարթնոց օդանավակայանում կկառուցվի նոր տերմինալ
«Արմենիա միջազգային օդանավակայաններ» ընկերությունը նախատեսում է 500 մլն դոլարի ներդրում կատարել նոր տերմինալի կառուցման համար։ Ուղևորահոսքը վերջին երկու տարում հասել է տարեկան ավելի քան 5,5 միլիոնի, ինչը գերազանցում է գործող հզորությունները։

Թմրամիջոցների ապօրինի շրջանառության դեպքերը նվազել են 28%-ով
2024 թվականին թմրամիջոցների ապօրինի շրջանառության դեպքերի թիվը նվազել է 1431-ով՝ 5033-ից դառնալով 3602։ Դատախազության տվյալներով՝ իրացման նպատակով շրջանառության դեպքերը կրճատվել են գրեթե մեկ երրորդով։

Միջազգային

Ռուսաստանը նոյեմբերին կավելացնի նավթի արդյունահանումը
ՕՊԵԿ-ի տվյալներով՝ ՌԴ-ն կկարողանա արտադրել օրական մինչև 9,53 մլն բարել։ Աճ է նախատեսվում նաև Ալժիրում, Քուվեյթում, ԱՄԷ-ում և Օմանում։

Իտալիան և ԱՄՆ-ը մաքսատուրքերից հետո սրել են հարաբերությունները
ԱՄՆ-ի որոշմամբ՝ իտալական մակարոնեղենի ներմուծման մաքսատուրքերը կբարձրանան՝ առաջացնելով գների գրեթե կրկնակի աճ։ Իտալիան դիմում է ԵՄ աջակցությանը՝ հարցը կարգավորելու նպատակով։

Tesla-ի մատակարարումները աճել են 7.4%-ով
Ընկերությունը 2025 թվականի երրորդ եռամսյակում մատակարարել է մոտ 497 հազար էլեկտրական մեքենա՝ սահմանելով նոր ռեկորդ։

Google-ը 4 մլրդ դոլար կներդնի ԱԲ ենթակառուցվածքների ստեղծման մեջ
Ընկերությունը կառուցում է տվյալների մշակման կենտրոն Արկանզաս նահանգում։ Ծրագիրը կավարտվի մինչև 2027 թվականը և ներառում է էներգետիկ կայունության բարելավման միջոցառումներ։