Հոկտեմբերի 17-ը աղքատության վերացման միջազգային օրն է․ 2023-ի տվյալներով ՀՀ բնակչության 23.7%-ն աղքատ է

Հոկտեմբերի 17-ը աղքատության վերացման միջազգային օրն է։

Համաձայն ՀՀ վիճակագրական կոմիտեի հրապարակած «Պարենային ապահովություն և աղքատություն, 2024 թ. հունվար-դեկտեմբեր» զեկույցի՝ ըստ 2023 թվականի տվյալների, Հայաստանի բնակչության 23.7%-ն աղքատ է․ ցուցանիշը նախորդ տարվա 24.8%-ից նվազել է 1.1 տոկոսային կետով։ Աղքատության մակարդակը տարբեր է քաղաքային և գյուղական բնակավայրերում․ քաղաքներում այն կազմել է 21.5%, իսկ գյուղերում՝ 27%։ Ծայրահեղ աղքատության մակարդակը նույնպես նվազել է՝ 2022 թվականի 1.2%-ից հասնելով 1.1%-ի 2023 թվականին։
 
«Աղքատությունը շարունակում է մնալ Հայաստանի մարտահրավերներից մեկը։
 
Դրա հաղթահարման համար առանցքային է ծառայությունների հասանելիությունն ու մատչելիությունը, հատկապես այնպիսի խմբերի համար, ինչպիսիք են երեխաները, տարեցները, հաշմանդամություն ունեցող անձինք, կանայք, տեղահանվածները և այլ  խմբեր, որոնք առավել զգայուն են աղքատության նկատմամբ։
 

Վերջին տարիներին պետության կողմից տրամադրվող ծառայությունների ծավալն աճել է, սակայն դեռևս լուրջ խնդիր է մնում դրանց մասին պատշաճ իրազեկումը և տեղեկատվության հասանելի ու մատչելի ձևաչափով տրամադրումը։ Բացի այդ, շարունակում է արդիական մնալ ծրագրերի ընթացակարգերի վերանայման ու դյուրինացման անհրաժեշտությունը, որի նպատակը պետք է լինի մարդուն ավելի արագ և նպատակային աջակցություն ցուցաբերելը։
 
Մենք պետք է ամեն բան անենք, որպեսզի նվազեցնենք մարդկանց կախվածությունը սոցիալական աջակցության ծրագրերից, սակայն դրանց տրամադրումը պետք է հիմնված լինի խտրականության բացառման, մարդու իրավունքների և արժանապատվության հանդեպ հարգանքի սկզբունքների վրա»,- սոցցանցի իր էջում գրել է ԱԺ «Քաղաքացիական պայմանագիր» խմբակցության պատգամավոր Զարուհի Բաթոյանը։