Փաշինյանը աշխատանքային այցով Տաջիկստանում

Վարչապետ Նիկոլ Փաշինյանը ԱՊՀ պետությունների ղեկավարների խորհրդի հերթական նիստին մասնակցելու նպատակով աշխատանքային այցով մեկնել է Տաջիկստանի Հանրապետություն։ Դուշանբեի միջազգային օդանավակայանում նրան դիմավորել է Տաջիկստանի վարչապետ Կոհիր Ռասուլզոդան։ Այնուհետև վարչապետը առանձնազրույց է ունեցել Տաջիկստանի նախագահ Էմոմալի Ռահմոնիի հետ։
Քննարկվել են Հայաստանի և Ադրբեջանի միջև խաղաղության հաստատումից հետո ստեղծված հնարավորությունները, տարածաշրջանային համագործակցության ամրապնդման ուղիները և տնտեսական ինտեգրման հեռանկարները։

ՀԱՄԱՍ-ը հայտարարում է պատերազմի ավարտի մասին

ՀԱՄԱՍ-ի առաջնորդ Հալիլ ալ-Հայան հայտարարել է Իսրայելի հետ պատերազմի ավարտի մասին։ Ըստ Reuters-ի՝ համաձայնությունը ներառում է Ռաֆայի սահմանային անցակետի բացում երկու ուղղությամբ և բոլոր ձերբակալված պաղեստինցիների ազատ արձակում։
Ավելի վաղ կողմերը համաձայնության էին եկել խաղաղության ծրագրի առաջին փուլի շուրջ։

Վերականգնվել է Կոլիզեումի ստորգետնյա գաղտնի անցուղին

Հռոմում հնագետները հայտարարել են Կոլիզեումի տակ գտնվող հնագույն ստորգետնյա անցուղու վերականգնման ավարտի մասին։ Ինչպես պարզվել է, այն ծառայել է որպես գաղտնի ելք հռոմեական կայսրերի համար։
55 մետրանոց միջանցքը փորվել է մեր թվականության առաջին և երկրորդ դարերում, և այժմ՝ երկար տարիների վերականգնումից հետո, առաջին անգամ բաց է հանրության համար։

Ադրբեջանի պաշտպանության նախարարն ընդգծում է խաղաղության կարևորությունը

Ադրբեջանի պաշտպանության նախարար Զաքիր Հասանովը հայտարարել է, որ օգոստոսի 8-ին Վաշինգտոնում ստորագրված համատեղ հռչակագիրը տարածաշրջանում խաղաղության հաստատման կարևոր փուլ է։
Անկարայում թուրք և վրաց գործընկերների հետ համատեղ ասուլիսի ընթացքում նա նշել է, որ հանդիպման ընթացքում ընդգծվել է տարածաշրջանային անվտանգության ամրապնդման և ընդհանուր սպառնալիքներին դիմակայելու անհրաժեշտությունը։

TRIPP նախագիծը կփոխի Հարավային Կովկասի աշխարհատնտեսական դինամիկան

ԱՄՆ-ում ՀՀ դեսպան Նարեկ Մկրտչյանը մասնակցել է Ռազմավարական ուսումնասիրությունների միջազգային ինստիտուտի ներկայացուցիչների հետ քննարկմանը՝ անդրադառնալով TRIPP նախագծի նշանակությանը։
Հանդիպման ընթացքում շեշտվել է, որ ծրագիրը կարող է նպաստել տարածաշրջանային հաղորդակցությունների ընդլայնմանը և անվտանգության նոր համակարգի ձևավորմանը Հարավային Կովկասում։

ՀՀ տարածքում ավտոճանապարհները հիմնականում անցանելի են

Փրկարար ծառայությունը տեղեկացրել է, որ ՀՀ տարածքում ավտոճանապարհները հիմնականում անցանելի են։
Կորեայի ձորի ճանապարհը, քարաթափման վտանգի պատճառով, օգոստոսի 19-ից փակ է երթևեկության համար։ Միաժամանակ հաղորդվել է, որ Ստեփանծմինդա–Լարս ավտոճանապարհը բաց է բոլոր տեսակի տրանսպորտային միջոցների համար։

Պուտինը խոսում է Իրանի հետ դիվանագիտական լուծումների մասին

Ռուսաստանի նախագահ Վլադիմիր Պուտինը հայտարարել է, որ Ռուսաստանը ստացել է ազդանշաններ՝ Իսրայելը պատրաստ է դիվանագիտական կարգավորմանը Իրանի միջուկային ծրագրի շուրջ։
Նա ընդգծել է, որ Մոսկվան սերտ կապի մեջ է իր իրանցի գործընկերների հետ և տեսնում է նրանց պատրաստակամությունը ԱԷՄԳ-ի հետ համագործակցությունը վերսկսելու հարցում։

ԱՄՆ Սենատը հաստատել է 2026 թվականի ռազմական բյուջեն

ԱՄՆ Սենատը հաստատել է ավելի քան 925 միլիարդ դոլար արժողությամբ ռազմական բյուջեն։
Օրինագծով նախատեսվում է Ուկրաինայի անվտանգության աջակցության ծրագրի երկարաձգում մինչև 2028 թվականը՝ 500 միլիոն դոլարի ֆինանսավորմամբ, ինչպես նաև հավելյալ 400 միլիոն դոլար օգնություն Ուկրաինային։

ՌԴ-ն հարվածել է Կիևին

Ռուսական զինված ուժերը գիշերը հարվածել են Կիևին՝ անօդաչու սարքերի միջոցով։ Բեկորների անկման հետևանքով հրդեհներ են բռնկվել բնակելի շենքերում, իսկ նախնական տվյալներով կա 12 վիրավոր։

Հզոր երկրաշարժ՝ Ֆիլիպինների հարավում

Ֆիլիպինների հարավում տեղի է ունեցել 7,4 մագնիտուդ ուժգնությամբ երկրաշարժ։ Ցունամիի նախազգուշացում է հայտարարվել նաև Ինդոնեզիայում և Պալաուում։
Զոհվել է առնվազն մեկ մարդ, կան վնասված շենքեր և կամուրջներ։ Նախագահ Ֆերդինանդ Մարկոս կրտսերը կոչ է արել տարհանել հարավային շրջանների բնակչությանը։

Իսրայելն ու ՀԱՄԱՍ-ը սկսում են պատանդների փոխանակման գործընթացը

Իսրայելի կառավարությունը հաստատել է Գազայում պահվող բոլոր պատանդների ազատ արձակման ծրագիրը։ ՀԱՄԱՍ-ի ներկայացուցիչը հայտարարել է, որ Իսրայելը համաձայնել է նաև ազատ արձակել բոլոր կանանց և երեխաներին։
Հրադադարի ռեժիմը ուժի մեջ է մտել հոկտեմբերի 9-ին։

Գնաճը Հայաստանում՝ 3,7%

ԵԱԶԲ տվյալներով՝ Հայաստանում տարեկան գնաճը կազմել է 3,7%՝ օգոստոսի 3,6%-ի դիմաց։
Սննդամթերքի գների աճը սեպտեմբերին հասել է 5,8%-ի, մինչդեռ ծառայությունների ոլորտում գնաճը դանդաղել է։

Բռնագանձված գույքը փոխանցվել է պետությանը

2023–2025 թթ․ ընթացքում ՀՀ գլխավոր դատախազության նախաձեռնությամբ պետությանը փոխանցվել է 32 միավոր անշարժ գույք և երկու տրանսպորտային միջոց՝ ապօրինի ծագում ունեցող գույքի բռնագանձման գործերով։
Պետական գույքի կառավարման կոմիտեն իրականացնում է դրանց ամրացման, հաշվառման և օտարման գործընթացը։

Հայաստանում հացի արտադրությունը աճել է

2024-ի հունվար–օգոստոսին Հայաստանում արտադրվել է 173,304 տոննա հաց, ինչը նախորդ տարվա համեմատ աճել է 0.2%-ով։
Ալյուրի արտադրությունն աճել է 7%-ով, ձավարեղենի՝ 39.7%-ով։

Վրաստանում օտարերկրյա աշխատողների համար կսահմանվեն նոր կանոններ

2026-ի մարտից Վրաստանում ուժի մեջ կմտնեն օտարերկրյա աշխատողների աշխատանքի և բնակության նոր կանոններ։
Միգրանտները պետք է ունենան աշխատանքի և բնակության թույլտվություններ՝ տրված աշխատանքի նախարարության կողմից։

Սաուդյան Արաբիան նոր վարկ է ներգրավում՝ 10 միլիարդ դոլարի չափով

Սաուդյան Արաբիան սկսել է բանակցություններ՝ մինչև 10 միլիարդ դոլարի վարկ ներգրավելու նպատակով՝ երկրի տնտեսական դիվերսիֆիկացման ծրագրերի ֆինանսավորման համար։
Նախարարությունը բանակցում է մի շարք խոշոր բանկերի հետ։

ՆԱՏՕ-ի երկրները քննարկում են սահմանային պաշտպանության նոր քայլեր

Ռուսաստանի սահմանին գտնվող ՆԱՏՕ-ի երկրները քննարկում են ռուսական ինքնաթիռների դեմ գործողությունների սահմանափակումների թուլացման հարցը, ինչպես նաև անօդաչուների տեղակայման հնարավորությունը՝ անվտանգության մակարդակը բարձրացնելու նպատակով։

Վանդալիզմ Կիրանցի վանքում

Պատմամշակութային պահպանության ծառայությունը տեղեկացրել է, որ Կիրանցի վանքի պատերին արձանագրվել են գրառումների և վանդալիզմի դեպքեր։
Գրառումները մասամբ մաքրվել են, սակայն որոշ ներկեր մնացել են՝ վնասելու վտանգի պատճառով։ Ծառայությունը կրկին հորդորում է պահպանել հուշարձանների ամբողջականությունը։

Մայրաքաղաքում օդի աղտոտվածության բարձր մակարդակ

Հիդրոօդերևութաբանության և մոնիթորինգի կենտրոնը հայտնել է, որ հոկտեմբերի առաջին շաբաթվա ընթացքում Երևանի օդում փոշու և ազոտի երկօքսիդի պարունակությունը գերազանցել է թույլատրելի նորմաները։

Ոստիկանության չորս ծառայող ազատվել է աշխատանքից

ՆԳՆ կարգապահական հանձնաժողովը որոշել է ոստիկանության չորս ծառայող ազատել աշխատանքից՝ կարգապահական կոպիտ խախտումների պատճառով։ Մեկ ծառայողի նկատմամբ կիրառվել է խիստ նկատողություն։

Ակցիա՝ ի պաշտպանություն Արսեն Ղուկասյանի

Գլխավոր դատախազության շենքի մոտ տեղի է ունեցել բողոքի ակցիա՝ ի պաշտպանություն հոկտեմբերի 7-ից կալանավորված Արսեն Ղուկասյանի։
Ակցիայի մասնակիցները պնդում են, որ նրան ապօրինի են կալանավորել, և առողջական վիճակը ծանր է։

Հոկտեմբերի 10-ը՝ Հոգեկան առողջության համաշխարհային օր

Առողջապահության համաշխարհային կազմակերպության կարգախոսն այս տարի է՝ «Հոգեկան առողջության ծառայությունների հասանելիություն աղետների և արտակարգ իրավիճակների ժամանակ»։
Հայաստանում հոգեբուժական օգնությունն անվճար է և տրամադրվում է պետական հոգածությամբ։

«ՏաԹևեր» ճոպանուղին՝ 15 տարեկան

Աշխարհի ամենաերկար հետադարձելի ճոպանուղին՝ «ՏաԹևերը», նշում է իր 15-ամյակը և կրկին առաջադրվել է «World Travel Awards 2025»-ի մրցանակին։
Ճոպանուղին մեծապես նպաստել է Հայաստանի զբոսաշրջության զարգացմանը։

ՀՀ ԱԳՆ-ն ողջունել է Գազայի հրադադարը

Հայաստանի արտաքին գործերի նախարարությունը X-ում հրապարակմամբ ողջունել է Գազայում հրադադարի համաձայնագիրը՝ նշելով, որ հույս ունի՝ այն ճանապարհ կհարթի Մերձավոր Արևելքում երկարատև խաղաղության համար։

Թրամփը չարժանացավ Նոբելյան մրցանակին

Խաղաղության Նոբելյան մրցանակը շնորհվել է Վենեսուելայի ընդդիմության առաջնորդ Մարիա Կորինա Մաչադոյին։ Դոնալդ Թրամփը, չնայած ակնկալիքներին, մրցանակը չի ստացել։

Ռուսաստանը առաջարկում է կազմակերպել «3+3» հարթակի նոր նիստ

ՌԴ դեսպան Սերգեյ Կոպիրկինը հայտնել է, որ մինչև 2025-ի վերջը կկազմակերպվի «3+3» ձևաչափի չորրորդ նախարարական հանդիպումը։
Նա նշել է, որ Հայաստանը և Ադրբեջանը պատրաստ են հյուրընկալել միջոցառումը, իսկ Թբիլիսիի մասնակցությունը դեռ քննարկվում է։

Ազատ է արձակվել «Սպուտնիկ Ադրբեջանի» տնօրենը

Բաքվում ձերբակալված «Սպուտնիկ Ադրբեջանի» գործադիր տնօրեն Իգոր Կարտավիխը ազատ է արձակվել։ Ռուսական կողմը փոխադարձաբար ազատ է արձակել Ադրբեջանում կալանավորված քաղաքացու։
Որոշումը կայացվել է Պուտին–Ալիև հանդիպման նախօրեին։

Հայաստանը միացել է Բնության պահպանության միջազգային միությանը

Հայաստանի շրջակա միջավայրի նախարար Համբարձում Մաթևոսյանը հայտարարել է, որ երկիրը պաշտոնապես դարձել է Բնության պահպանության միջազգային միության անդամ։
Հայաստանը պարտավորվել է մինչև 2030 թվականը անտառապատ տարածքները հասցնել 12.9%-ի և ամրապնդել Սևանա լճի էկոհամակարգի պաշտպանությունը։

ՊԵԿ-ը բացահայտել է չգրանցված աշխատողների և ՀԴՄ խախտումների դեպքեր

ՊԵԿ-ի տվյալներով՝ հուլիս–սեպտեմբեր ամիսներին խոշոր հարկ վճարողների մոտ հայտնաբերվել է 136 չգրանցված աշխատող և ՀԴՄ-ի խախտումների 24 դեպք։ Ընդհանուր տուգանքների չափը կազմել է շուրջ 162 միլիոն դրամ։

ԱՄՆ-ն սահմանափակումներ է սահմանել մի շարք ընկերությունների նկատմամբ

ԱՄՆ առևտրի նախարարությունը սահմանափակել է Չինաստանում, Թուրքիայում և ԱՄԷ-ում գործող 26 ընկերության գործունեությունը՝ ազգային անվտանգության սպառնալիքների հիմքով։
Ընկերությունների մեծ մասը չինական են, և Վաշինգտոնը նրանց մեղադրում է ԱՄՆ-ի շահերին հակասող գործունեության մեջ։