Հոկտեմբերի 10-ի բիզնես լուրերը

Տեղական

Սննդամթերքի գների աճը Հայաստանում արագացել է․ ԵԱԶԲ
ԵԱԶԲ-ի տվյալներով՝ Հայաստանում տարեկան գնաճը կազմել է 3.7%՝ օգոստոսի 3.6%-ի փոխարեն։ Սննդամթերքի գների աճը սեպտեմբերին հասել է 5.8%-ի՝ միջազգային շուկաների փոփոխությունների ազդեցությամբ, մինչդեռ ծառայությունների և ոչ պարենային ապրանքների գնաճը դանդաղել է։

ՊԵԿ-ը բացահայտել է չձևակերպված աշխատողներ և ՀԴՄ խախտումներ
Հուլիս-սեպտեմբեր ամիսներին ՊԵԿ-ը խոշոր հարկ վճարողների մոտ հայտնաբերել է 136 չգրանցված աշխատող և ՀԴՄ կիրառման խախտումներ։ Արդյունքում առաջադրվել է շուրջ 162 մլն դրամի տուգանք։

Ապօրինի գույքի բռնագանձմամբ պետությանը փոխանցվել է 32 անշարժ գույք և 2 տրանսպորտային միջոց
2023-2025թթ․ ընթացքում պետական գույքի կոմիտեն ստացել է բռնագանձված գույք, որն այժմ գտնվում է հաշվառման և օտարման փուլում։ Գույքը ձեռք է բերվել ապօրինի ծագման հիմքերով դատական որոշումների արդյունքում։

Հայաստանը պաշտոնապես միացել է Բնության պահպանության միջազգային միությանը
Շրջակա միջավայրի նախարար Համբարձում Մաթևոսյանը հայտնել է, որ Հայաստանը դարձել է կառույցի անդամ և պարտավորվել մինչև 2030թ․ վերականգնել անտառապատ տարածքները մինչև 12.9% և ամրապնդել Սևանա լճի էկոհամակարգի պաշտպանությունը։

Միջազգային

ԱՄՆ Սենատը հաստատել է 2026 թվականի ռազմական ծախսերի նախագծը
Պաշտոնապես հաստատվել է 900 մլրդ դոլարից ավելի ծախսային փաթեթ՝ Պենտագոնի կարիքների համար։ Օրինագծին կողմ է քվեարկել 77 սենատոր, իսկ 20-ը՝ դեմ։

ԱՄՆ-ը սահմանափակել է արտահանումը Չինաստանի, Թուրքիայի և ԱՄԷ-ի ընկերությունների նկատմամբ
Արտահանման սահմանափակումները վերաբերում են 26 ընկերության, որոնցից մեծ մասը չինական են։ Վաշինգտոնը դրանց գործունեությունը դիտարկում է որպես սպառնալիք ազգային անվտանգությանը։

Սաուդյան Արաբիան կարող է ներգրավել մինչև 10 մլրդ դոլարի վարկ
Գումարը նախատեսվում է ուղղել տնտեսության դիվերսիֆիկացման ծրագրերին։ Ֆինանսների նախարարությունը բանակցում է մի շարք խոշոր միջազգային բանկերի հետ։

Վրաստանում օտարերկրյա աշխատողների համար նոր կանոնները ուժի մեջ կմտնեն 2026-ի մարտին
Նոր կարգավորումների համաձայն՝ օտարերկրացիները պարտավոր կլինեն ստանալ աշխատանքի թույլտվություն, իսկ հեռավար աշխատողները՝ առանձին կարգավիճակ։

Հետաքրքիր

Հայաստանում հացի արտադրությունն աճել է 0.2%-ով
2025-ի հունվար-օգոստոսին արտադրվել է ավելի քան 173 հազար տոննա հաց։ Ալյուրի արտադրությունն աճել է 7%-ով, իսկ ձավարեղենինը՝ գրեթե 40%-ով՝ ըստ Վիճակագրական կոմիտեի տվյալների։