Հոկտեմբերի 1-ի բիզնես լուրերը

Տեղական

ՏԿԵ նախարարը քննարկել է ԱՄԷ-ի հետ էներգետիկ համագործակցությունը
Դավիթ Խուդաթյանը ԱՄԷ-ի էներգետիկայի նախարարի հետ քննարկել է արևային էներգիայի զարգացման ու կուտակման փորձը, ինչպես նաև ջրային ոլորտում համագործակցության հնարավորությունները։

Խաղողի մթերումը ընթանում է առանց խոչընդոտների
Էկոնոմիկայի նախարար Գևորգ Պապոյանը հայտարարել է, որ խաղողի մթերման գործընթացը ընթանում է անխափան։ Նախարարը նաև անձամբ ծանոթացել է ընկերություններում ընթացող աշխատանքներին։

Իրան–Հայաստան բարձր լարման գիծը մասամբ կավարտվի 2026-ի առաջին կիսամյակում
Նոր գծի առաջին շղթան նախատեսվում է ավարտել մինչև Նորավան ենթակայան։ Ամբողջական ավարտից հետո թողունակությունը կաճի ավելի քան երեք անգամ։

Հուլիսին բանկային ավանդներն ու վարկերը աճել են
Հայաստանի առևտրային բանկերում դրամային միջոցների շնորհիվ ավանդներն աճել են 0.3%-ով, իսկ վարկերը՝ 1.2%-ով։

Միջազգային

ԵԱՏՄ վարչապետները հաստատել են տրանսպորտային միջանցքների և ներմուծման վերահսկողության որոշումները
Մինսկում ընդունվել է վեց փաստաթուղթ, որոնց թվում՝ «Արևելք-Արևմուտք» և «Հյուսիս-Հարավ» տրանսպորտային ենթակառուցվածքների զարգացման ծրագիր և ներմուծվող ապրանքների հետագծելիության մեխանիզմի գործարկում։

ԱՄՆ-ը թույլ կտա հարավկորեացիներին աշխատել ժամանակավոր վիզաներով
Նոր համաձայնության շրջանակում կբացվեն հատուկ գրասենյակներ և ուղիներ, որոնք կօգնեն հարավկորեական ընկերություններին ավելի հեշտ ներգրավվել ԱՄՆ-ում։

ԱՄՆ Կոնգրեսը չի կարողացել համաձայնության գալ բյուջեի շուրջ
Երկիրը մտել է կառավարության փակման ռեժիմ՝ դադարեցնելով ոչ էական ծառայությունների աշխատանքը։ Սա առաջին դեպքն է վերջին 7 տարում։

Մեծ Բրիտանիայի ՀՆԱ-ն աճել է 0.3%-ով
Երկրորդ եռամսյակում աճը ձևավորվել է հիմնականում պետական ծախսերի հաշվին, մինչդեռ արտահանման ծավալները նվազել են։