Նոյեմբերի 6-ի կարևոր լուրերը

Ինչ է կատարվել Հայաստանում և աշխարհում

Ռուբեն Վարդանյանի ուղերձը 

Բաքվում ապօրինաբար պահվող Ռուբեն Վարդանյանը հեռախոսազրույց է ունեցել ավագ որդու՝ Դավիթ Վարդանյանի հետ և փոխանցել երեք ուղերձ․
«Արցախը եղել է, կա և կլինի»,
«Հավատա ինքդ քեզ՝ որպես Աստծո մի մասի»,
«Իսկական հերոսը նա է, ով հույս է վառել այնտեղ, որտեղ այն չկա»։

Ռուսական ցորենը հասել է Հայաստան՝ Ադրբեջանի տարածքով

Ռուսական ցորենով բեռնված գնացքը ժամանել է Հայաստան՝ անցնելով Ադրբեջանի և Վրաստանի տարածքով։ Կառավարությունը դա գնահատել է որպես տարածաշրջանային հաղորդակցությունների վերականգնման և խաղաղության հաստատման գործնական քայլ՝ Վաշինգտոնյան պայմանավորվածությունների շրջանակում։

Ռուսաստանի փոխվարչապետը՝ Հայաստանի ուղղությամբ բեռնափոխադրությունների մասին

Ալեքսեյ Օվերչուկը հայտարարել է, որ Ռուսաստանի և Հայաստանի միջև երկաթուղային կապի վերականգնումը «իրական ներդրում է» Հարավային Կովկասում խաղաղության հաստատման գործում և ընդգծում է համագործակցության ընդհանուր ձգտումը։

Ռուսական ցորենի նոր մատակարարումներ՝ մինչև 2026-ի հունվար

ՌԴ տրանսպորտի նախարարության տվյալներով՝ մինչև 2026 թվականի հունվարի վերջ Հայաստան կժամանի ևս 132 վագոն ռուսական ցորեն՝ Ադրբեջանի և Վրաստանի միջով։ Սա 1990-ականներից ի վեր առաջին նման դեպքն է։

Թրամփը կոչ է արել դադարեցնել շաթդաունը

ԱՄՆ նախագահ Դոնալդ Թրամփը Սենատում հանրապետականներին հորդորել է դադարեցնել բյուջետային փակումը՝ ասելով․ «Պետք է բացել երկիրը»։ ԱՄՆ-ում կառավարական ֆինանսավորման դադարեցման հետևանքով պետական կառույցները շարունակում են չաշխատել։

Իրանի և Ֆրանսիայի առաջնորդների հեռախոսազրույցը

Իրանի նախագահ Մասուդ Փեզեշքիանը Ֆրանսիայի նախագահ Մակրոնի հետ զրույցում ընդգծել է, որ վստահության վերականգման պատասխանատվությունը Արևմուտքի վրա է, ոչ թե Թեհրանի։ Զրույցը տեղի է ունեցել Իրանի միջուկային ծրագրի շուրջ լարվածության ֆոնին։

Բելգիայում հրդեհվել է «Բարսելոնայի» երկրպագուների ավտոբուսը

Բրյուգեում, խաղից մի քանի ժամ առաջ, հրդեհվել է «Բարսելոնայի» երկրպագուներին տեղափոխող ավտոբուսը։ Տուժածների մասին տվյալներ չկան։

Սննդամթերքի գներն աճել են՝ առավելապես յուղի և սուրճի խմբերում

2025թ. հոկտեմբերին սննդամթերքի գներն աճել են միջինում 3.7%-ով։ Ամենամեծ գնաճը գրանցվել է բուսական յուղի (13.5%) և սուրճի (11.9%) խմբերում։ Գների նվազում է արձանագրվել միայն մրգերի դեպքում՝ մոտ 4.9%։

Ուսուցիչների աշխատավարձը կարող է հասնել 700 հազար դրամի

Վարչապետ Նիկոլ Փաշինյանի խոսքով՝ Հայաստանում արդեն կան ուսուցիչներ, որոնց աշխատավարձը գերազանցում է 700 հազար դրամը։ Ըստ նրա՝ կրթության ոլորտում շարունակվում են վարձատրության բարձրացման գործընթացները։

Tesla-ի տնօրենների խորհուրդը՝ Մասկի հնարավոր հեռացման մասին

«Tesla»-ի տնօրենների խորհուրդը հայտարարել է, որ Իլոն Մասկը կարող է հեռանալ, եթե ներդրողները մերժեն նրա գրեթե մեկ տրիլիոն դոլար արժողությամբ փոխհատուցման ծրագիրը։ Քվեարկությունը նախատեսված է առաջիկայում։

Հայաստանը՝ Wanderlust մրցանակաբաշխության լավագույն ուղղությունների շարքում

Հայաստանը զբաղեցրել է 8-րդ տեղը Wanderlust Reader Travel Awards 2025-ի «Ամենահետաքրքիր նոր ուղղություն» անվանակարգում՝ ընդգծելով երկրի զբոսաշրջային գրավչությունը։

ԱՄՆ-ում նավթի պաշարներն աճել են

Ամերիկյան նավթի պաշարները մեկ շաբաթում ավելացել են 5.2 միլիոն բարելով։ Միևնույն ժամանակ բենզինի պաշարները նվազել են 4.7 միլիոն բարելով։

Շաթդաունը կրճատում է օդանավակայանների աշխատանքը

ԱՄՆ-ի ամենաբեռնված օդանավակայանները սկսել են կրճատել չվերթների սպասարկումը՝ շաթդաունի հետևանքով։ Հարյուրավոր չվերթներ կարող են չեղարկվել։

Ուկրաինայում աշխատուժի պակասը հասել է 30%-ի

Ուկրաինայի Միգրացիոն ծառայության տվյալներով՝ գործատուները չեն կարողանում համալրել թափուր հաստիքները։ Արտաքին աշխատողների ներգրավումը դարձել է հիմնական լուծում։