Նոյեմբերի 4-ի բիզնես լուրերը

Տեղական

2025-ի հունվար–սեպտեմբեր ամիսներին Հայաստանում միջին ամսական անվանական աշխատավարձը կազմել է 295,042 դրամ։ 2024թ․ համեմատ արձանագրվել է 5.3% աճ։ Պետական հատվածում միջին աշխատավարձը կազմել է 227,888 դրամ՝ 4.8% աճով, իսկ ոչ պետական հատվածում՝ 320,901 դրամ՝ 5.1% աճով։

ՀՀ Կենտրոնական բանկը անփոփոխ է թողել վերաֆինանսավորման տոկոսադրույքը՝ սահմանելով այն 6․75%։ Լոմբարդային ռեպոյի տոկոսադրույքը սահմանվել է 8.25%, իսկ բանկերից ներգրավվող միջոցների տոկոսադրույքը՝ 5.25%։

Տաթևի վանքը ՅՈՒՆԵՍԿՕ-ի ուժեղացված պաշտպանության ցանկում ներառելու հայտն արդեն ներկայացվել է Արտաքին գործերի նախարարություն։ ԿԳՄՍ նախարար Ժաննա Անդրեասյանի խոսքով՝ այժմ աշխատանք է ընթանում հուշարձանը նախնական ցանկից հիմնական ցանկ տեղափոխելու ուղղությամբ։

Հայաստանում 2025-ի երրորդ եռամսյակում 12-ամսյա գնաճը կազմել է 3.7%։ Տեղական ապրանքների և ծառայությունների նկատմամբ արտաքին պահանջարկի աճը նպաստել է գնաճային ցուցանիշի վերականգնմանը։

2025-ի երրորդ եռամսյակում Հայաստանում տնտեսական ակտիվությունն աճել է։ ԿԲ-ի տվյալներով՝ դրան նպաստել են շինարարության և ծառայությունների ոլորտների բարձր աճը, ինչպես նաև մի շարք ոչ կառուցվածքային գործոններ։

Միջազգային

2024 թվականին աշխարհում մոտ 673 միլիոն մարդ բախվել է սովի, իսկ շուրջ 2.3 միլիարդ մարդ՝ սննդային անապահովության։ Այս մասին հայտարարել է ՄԱԿ-ի Գլխավոր ասամբլեայի 80-րդ նստաշրջանի նախագահ Աննալենա Բերբոքը՝ ընդգծելով կլիմայական փոփոխությունների հետևանքով առաջացած «սովի և աղքատության նոր օջախները»։

Ռուսաստանն ու Չինաստանը կշարունակեն համագործակցությունը ԵԱՏՄ-ի, ՇՀԿ-ի և այլ կազմակերպությունների միջև երկխոսության ամրապնդման ուղղությամբ։ Նոյեմբերի 3-ին Միխայիլ Միշուստինը երկօրյա այցով ժամանել է Չինաստան, որտեղ կայացել է երկու երկրների կառավարությունների ղեկավարների 30-րդ հանդիպումը։ Ստորագրվել է համատեղ կոմյունիկե և մի շարք փաստաթղթեր։

Հարավային Կովկասի տնտեսական աճը 2025-ին կդանդաղի՝ ըստ Համաշխարհային բանկի զեկույցի։ 2024-ի 5.7%-անոց աճից հետո 2025-ին տարածաշրջանի տնտեսությունը կաճի 3.7%-ով, իսկ 2026-ին՝ 3.3%-ով։

Amazon-ը OpenAI-ին կտրամադրի հաշվարկային հզորություններ՝ 38 միլիարդ դոլարի պայմանագրի շրջանակում։ Նոր հզորությունները կօգտագործվեն ChatGPT-ի և հաջորդ սերնդի արհեստական բանականության մոդելների ուսուցման համար։