Նոյեմբերի 10-ի բիզնես լուրերը

Տեղական

Հայաստանն ու Հնդկաստանը մշակում են միջազգային ավտոմոբիլային փոխադրումների մասին համաձայնագիրը։ Այն կարգավորելու է երկու երկրների միջև ավտոմոբիլային ուղևորափոխադրումները և բեռնափոխադրումները, որոնք ներկայումս կանոնակարգված չեն։ Նմանատիպ համաձայնագիր նախատեսվում է ստորագրել նաև Չինաստանի հետ։

Հայաստանում հաստատվել է գրիպ A-ի H3N2 ենթատեսակը։ ՀՎԿ ազգային կենտրոնը հորդորում է պատվաստվել սեզոնային գրիպի դեմ և խուսափել շփումից հիվանդ մարդկանց հետ։ Կենտրոնը շեշտում է՝ հիվանդության դեպքում անհրաժեշտ է մնալ տանը և չզբաղվել ինքնաբուժմամբ։

2025-ի հունվար–սեպտեմբերին ՀՀ հեռահաղորդակցության ոլորտում հասույթը կազմել է 126,781.2 մլն դրամ՝ 2.5% աճով։ Ռադիոհեռարձակման ոլորտում գրանցվել է 3.7% անկում, հեռուստածրագրերի արտադրության՝ 2.2% անկում, իսկ հեռահաղորդակցության հիմնական հատվածում՝ 2.9% աճ։

Այս տարվա հունվար–սեպտեմբերին 1000 խոշոր հարկատուների կողմից մուծված ակցիզային հարկը կազմել է 108.37 մլրդ դրամ՝ աճելով 14.19%-ով։ Սա ընդհանուր հարկային մուտքերի 7.53%-ն է։

Տարվա առաջին ինը ամիսներին Հայաստանում արտադրվել է 194,708.6 տոննա հաց՝ 0.2% աճով։ Ալյուրի արտադրությունը ավելացել է 6.6%-ով, իսկ ձավարեղենի արտադրությունը՝ 27.4%-ով։

Միջազգային

Հոկտեմբերին պարենային ապրանքների համաշխարհային գներն ընդհանուր առմամբ նվազել են՝ պայմանավորված պաշարների առատությամբ։ ՄԱԿ-ի Պարենի և գյուղատնտեսության կազմակերպության տվյալներով՝ մսի գների ինդեքսը նվազել է 2%-ով՝ խոզի և թռչնամսի գների անկման պատճառով, մինչդեռ տավարի մսի գները շարունակել են աճել։

ԱՄՆ-ի Սենատը հավանություն է տվել «շաթդաունն» ավարտելու օրինագծերի փաթեթին։ Փաթեթը ապահովում է պետական կառույցների, Պենտագոնի և մի շարք սոցիալական ծրագրերի ֆինանսավորումը՝ կանխելով դաշնային աշխատողների զանգվածային կրճատումները։

Թրամփի վարչակազմը հաստատել է նոր կանոններ, որոնք թույլ կտան մերժել ԱՄՆ վիզաներ քրոնիկ հիվանդություններ ունեցող դիմորդներին։ «Ռիսկային» համարվող հիվանդությունների թվում են շաքարային դիաբետը, սրտանոթային և հոգեկան խանգարումները։ Վիզայի գնահատման ժամանակ հաշվի կառնվի նաև դիմորդի ընտանիքի առողջական վիճակը։

OpenAI-ը նախատեսում է մինչև տարեվերջ հասնել տարեկան 20 միլիարդ դոլար եկամուտի։ Ընկերության ղեկավար Սեմ Ալթմանի խոսքով՝ վերջին ամիսներին ստորագրվել են ավելի քան 1.4 միլիարդ դոլարի պայմանագրեր։