Հնդկաստանում արձանագրվել է Նիպահ վիրուսի բռնկում

Նիպահ վիրուսը զոոնոզ հիվանդություն է, որը կարող է փոխանցվել կենդանիներից մարդկանց։

Հնդկաստանի Արևմտյան Բենգալիա նահանգում արձանագրվել է Նիպահ վիրուսի բռնկում։ Տեղեկատվության համաձայն՝ հիվանդությունն արդեն տարածվել է բուժաշխատողների շրջանում, ինչի ֆոնին մի շարք երկրներ խստացրել են Հնդկաստանից ժամանող ուղևորների առողջապահական վերահսկողությունը։

Տարածման կանխարգելման նպատակով Թաիլանդը սկսել է ստուգումներ իրականացնել Արևմտյան Բենգալիայից ժամանող ուղևորների նկատմամբ՝ երեք միջազգային օդանավակայաններում։ Նեպալում ստուգումները իրականացվում են ինչպես Կատմանդու օդանավակայանում, այնպես էլ Հնդկաստանի հետ ցամաքային սահմանային անցակետերում։

Ղրղզստանի, Ղազախստանի և Ուզբեկստանի իշխանությունները ևս հայտարարել են սահմանային անցակետերում բժշկական հսկողության խստացման մասին՝ հաշվի առնելով տարածաշրջանային ռիսկերը։

Հունվարի սկզբին Արևմտյան Բենգալիայում Նիպահ վիրուսով վարակվել է հինգ բուժաշխատող, որոնցից մեկի վիճակը գնահատվում է ծանր։ Վարակվածների հետ շփման մեջ եղած մոտ 110 անձ մեկուսացվել է կարանտինային պայմաններում։

Նիպահ վիրուսը զոոնոզ հիվանդություն է, որը կարող է փոխանցվել կենդանիներից մարդկանց։ Մասնագետների տվյալներով՝ հիվանդության դեմ հաստատված պատվաստանյութ կամ արդյունավետ բուժում ներկայում գոյություն չունի։ Մահացության մակարդակը, ըստ տարբեր գնահատականների, կարող է կազմել 40-ից մինչև 75 տոկոս։