Նիկոլ Փաշինյանը ներկայացրել է ադրբեջանական նավթամթերքի ներմուծման արդյունքները

Նիկոլ Փաշինյանը տեղի ունեցող գործընթացները բնութագրել է որպես խաղաղության օրակարգի տնտեսական դրսևորում։

ՀՀ վարչապետ Նիկոլ Փաշինյանի հայտարարության համաձայն՝ 2025 թվականի դեկտեմբերի կեսերից Հայաստան է սկսվել ադրբեջանական արտադրության բենզինի ներմուծում, ինչի արդյունքում երկրի վառելիքի շուկայում արձանագրվել է գների նվազում մի քանի ապրանքատեսակների գծով։

Վարչապետի ներկայացրած տվյալներով՝ Ադրբեջանից հիմնականում ներմուծվում է պրեմիում դասի բենզին, որի նվազագույն շուկայական գինը նվազել է շուրջ 15%-ով։ Եթե նախկինում 1 լիտրի գինը կազմում էր մոտ 510 դրամ, ապա ներկայում այն հասել է 430 դրամի։

Դեկտեմբերի 11-ի դրությամբ ռեգուլյար բենզինի նվազագույն գինը շուկայում կազմել է 500 դրամ, մինչդեռ ներկայում այն նվազել է մինչև 460 դրամ, ինչը համապատասխանում է շուրջ 8% գնանկման։

Վարչապետի խոսքով՝ 2 օր առաջ Ադրբեջանից Հայաստան է ներմուծվել նաև դիզվառելիք, որի գինը այս ընթացքում նվազել է մոտ 2%-ով։

Նիկոլ Փաշինյանի գնահատմամբ՝ գների նվազումը պայմանավորված է շուկայի մրցակցային միջավայրի փոփոխությամբ։ Նա նշել է, որ նախկինում բենզինի շուկայում առկա են եղել մենաշնորհային դիրքեր, իսկ նոր ներմուծումները ստիպում են գործող դերակատարներին վերանայել գնային քաղաքականությունը։

Միաժամանակ վարչապետը նշել է, որ ինչպես Հայաստանում, այնպես էլ Ադրբեջանում հնչում են քննադատություններ վառելիքի փոխադարձ առևտրի վերաբերյալ։ Նրա խոսքով՝ այդ մտահոգությունները տեղին չեն՝ հաշվի առնելով երկու երկրների միջև հաստատված խաղաղ հարաբերությունները։

Նիկոլ Փաշինյանը տեղի ունեցող գործընթացները բնութագրել է որպես խաղաղության օրակարգի տնտեսական դրսևորում՝ ընդգծելով, որ գների նվազումից շահում են Հայաստանի քաղաքացիները։