Հաջորդ տարի հայտարարատու է դառնալու ևս 500 հազար քաղաքացի. Թունյանը՝ հայտարարագրման համակարգի բարելավման մասին

Հայտարարագրի հետ կապված՝ մի բանի մասին եմ ուզում տեղեկացնել: Ինչպես խոստացել էինք, մինչև տարեվերջ պիտի հայտարարագրման համակարգի բարելավմանը վերաբերող փաթեթ ներկայացնենք, որպեսզի մարդկանց կյանքն ավելի հեշտացնենք՝ հաշվի առնելով, որ հաջորդ տարի հայտարարատու են դառնալու ևս 500 հազար քաղաքացիներ: Հատկապես խոսքս վերաբերում է թոշակառուներին: Այդ մասին Ազգային ժողովի՝ սեպտեմբերի 12-ի նիստին ասաց «Քաղաքացիական պայմանագիր» խմբակցության պատգամավոր Բաբկեն Թունյանը:

«Այդ հանգամանքը հաշվի առնելով՝ մենք պետք է լուծում առաջարկենք, որ իրենց համար բարդություններ չլինեն: Իմ կարծիքով՝ այդ լուծումն ընդունելի կլինի բոլորի կողմից»,- ասաց Թունյանը:

Հիշեցնենք, որ հայտարարագիր լրացնելու վերջնաժամկետ է սահմանված 2025 թվականի նոյեմբերի 1-ը: Մինչև ժամկետի ավարտը հայտարարագիր պետք է լրացնեն վարձու աշխատողները, քաղաքացիաիրավական պայմանագրերով աշխատողները, պետական համայնքային աշխատողները, ծառայողները, ինչպես նաև հանրային պաշտոն զբաղեցնողները, 1 միլիարդից ավելի համախառն եկամուտ հայտարարագրած կազմակերպությունում մասնակից հանդիսացող քաղաքացիները՝ բաժնետեր, փայատեր կամ անդամ, փողերի լվացման և ահաբեկչության ֆինանսավորման դեմ պայքարի օրենքով իրական շահառու համարվողները, 2024 թվականին 20 միլիոն և ավելի փոխառություն ստացածները: