Նոր նախագծով առաջարկվում է վավերացնել «Աղետների նկատմամբ դիմակայուն ենթակառուցվածքի կոալիցիայի» կանոնադրությունը

Նախաձեռնությամբ առաջարկվում է վավերացնել «Աղետների նկատմամբ դիմակայուն ենթակառուցվածքի կոալիցիայի» (ԱԴԵԿ) կանոնադրությունը:

ՀՀ ներքին գործերի նախարարի տեղակալ Արմեն Ղազարյանի խոսքով կոալիցիան գլոբալ գործընկերություն է, որի նպատակն է բարելավել ենթակառուցվածքային համակարգերի դիմակայունությունը կլիմայի փոփոխության և աղետների ռիսկերի կառավարման հանդեպ:

«Սա փոխկապակցված է նաև աղետների ռիսկի նվազեցման Սենդայի գործողությունների շրջանակային ծրագրի իրագործման հետ»,- հավելել է փոխնախարարը:

Պլատֆորմի ստեղծման գաղափարի նախաձեռնողը Հնդկաստանն է: Նախատեսվում է տեխնիկական աջակցության, հետազոտությունների և համատեղ դասընթացների միջոցով զարգացնել ոլորտային կարողությունները: Միջազգային լավագույն փորձը տեղայնացնելու նպատակով կարևորվել է հարթակին Հայաստանի միանալը:

«Մարդկության պատմությունը ցույց է տվել, որ բնակլիմայական աղետների հաղթահարման և դրանց հետևանքների վերացման լավագույն տարբերակն է համագործակցությունը, տարբեր պետությունների ներգրավվածությունն ու փոխօգնությունը»,- ընդգծել է հարակից զեկուցող, պատգամավոր Քրիստինե Պողոսյանը:

Նախագիծը քննարկվել է Պաշտպանության և անվտանգության հարցերի մշտական հանձնաժողովի՝ սեպտեմբերի 5-ի նիստում և ստացել դրական եզրակացություն: